SAR
Províntzia de su Sud Sardigna e Comunu de Seddori: Sa Províntzia de su Sud Sardigna e su Comunu de Seddori, alleau in su progetu "Sighidura de sa sperimentatzioni linguística, faint sciri a is tzitadinas e a is tzitadinus chi si arritzint is iscritzionis po su labboratóriu artísticu - culturali in Língua Sarda "Is Puponis" po pipius de is 6 fintzas a 10 annus, chi si fait su 13 e 14 de Meseidas 2021, h. 15:00 – 18:00, in sa Bibblioteca Comunali de Seddori, ande su Polu Culturali e Tzentru de Alta Formatzioni, in s'edifítziu béciu de is Scolòpius, Parcu S'Arei.
Si podint iscriri non prus de 23 pipius
Su labboratóriu est a indonu, ca ddu finantziat sa Regioni Autònoma de Sardigna cunformas a sa L.482/99 e a sa L.R. 22/2018, art.10.
Su labboratóriu tenit sa tarea de recuperai e de fai a connosci is términis chi pertocant su bistiri traditzionali sardu e, giai chi si torrat a fai is trabballus de Eugenio Tavolara e de is sorris Giuseppina e Albina Coroneo, de acostai is pipius a s'arti, fadendiddi a connosci is artístas sardus de primori.
Cumenti a trabballu finali de su labboratóriu is pipias e is pipius depint fai unu puponi cun su bistiri sardu.
Po partitzipai tocat a s'iscriri cumpilendu su mollu chi agatais in Bibblioteca e in su giassu www.limbasardasudsardigna.it . Su mollu ddu podeis intregai a sa Bibbliotecària.
Is iscritzionis scadint martis 7 de Meseidas 2021.
Su labboratóriu ddu organizat s'Ufítziu de Língua Sarda de su Comunu de Seddori cun sa collabboratzioni pretziosa de "Cultura Moda Solidale – CMS" e de sa Bibblioteca Comunali de Seddori