SARDU

ARRATZETAS PO PÓBURUS – MEXINA IN SARDIGNA IN SA MITADI DE S’OTUXENTUS

In su cuntestu de is interventus po favoressi s’avaloramentu de sa stória e de sa cultura locali, de su 2007, sa Províntzia at inghitzau una circa de stúdiu de is documentu allogaus in s’arcivu de su Spidali Managu de Siddi, cun su progetu “ Is arremédius de erbas de su spidali Managu de Siddi” / “I rimedi a base di erbe dell’ospedale Managu di Siddi”, curau de sa Prof.ra Cecilia Tasca, présidi de su cursu po is Benis Culturalis de s’Universidadi de Casteddu.

Su trabballu cunsistit in s’analisi, in sa cumparatzioni e in sa circa fata, cun pibinchéntzia, asuba de is Arregistrus generalis de is malàdius e asuba de Cuadernus de bisita de su spidali, chi donat assisténtzia sanitària a is póburus chi biviant in cussu territóriu chi in dí de oi currespundit a su territóriu de sa Províntzia de su Campidanu de Mesu e a is àreas lacanantis.

Su stúdiu asuba de s’arcivu de su spidaleddu de sartu chi, intra de su 1860 e su 1890, períodu chi fiat in atividadi, at arregistrau 700 arricoveraus, est acabbau in su 2009 cun s’imprenta de su líbburu “Arratzetas po póburus – Mexina in Sardigna in sa mitadi de s’Otuxentus”,curau de sa Prof.ra Tasca.

Su líbburu, presentau su 27 de Friaxu 2009 in Siddi, spartzinau in totus is bibliotecas, is scolas e is comunus de sa Províntzia, arregallau a sa Regioni, a is Universidadis sardas e a s’Arcivu de Stadu, oi si presentat in formau digitali in su giassu istitutzionali de s’Enti po chi siat a dispositzioni de totus.