Sa Die de sa Sardigna, istituida cun sa Lei Regionali 14 de Cabudanni 1993, n.44, si proponit de afestai su 28 de Abrili che festa natzionali de su Pópulu Sardu.

 In custa data, si arremonat sa bogada de is Piemontesus de su Rènniu de Sardigna in su 1794.

Sa Províntzia de su Campidanu de Mesu, gràtzias a su dinai chi sa Regioni Autónoma de Sardigna ponit a dispositzioni po is afestus de  Sa Die de Sa Sardigna, at pótziu cuncordai  cun su Liceu "E.Piga" de Biddacidru  un'atóbiu de stúdiu: "S'Istória de Sardigna excursus  istóricu fintzas a su 1861 e contribbutu de sa Sardigna a sa nàscita de su Stadu Uniu" .

S'est bófiu  afestai sa Die de sa Sardigna e in su matessi  tempus arremmonai su de 150 anniversàrius de s'Unidadi de s'Itàlia e is sacrifítzius chi su "Rénniu de Sardigna" e pruschetotu is Sardus asuba sa peddi  insoru  ant dépiu e ancoras depint baliai, po cuntribbuiri a s'Unidadi de s'Itàlia.

Addia de s'argumentu spetzíficu is interventus de is reladoris ant arriguardau períodus diferentis de sa Stória cosa nosta, donendusí  diaici sa possibbilidadi de dda connosci, giaichí, a dolumannu, ancoras a scola non dda studiaus.

A parti is cuntribbutus interessantis e praxilis de is reladoris, de importu mannu est stétiu su trabballu fatu de is studiantis asuba de Vincenzo Sulis.

Is arrelatas presentadas in custu atóbiu de stúdiu funt stétias furriadas in sardu e pubricadas in su volúmini "Atus de su Cunvegnu".

Ant pigau parti :

Prof. Franceso Cesare Casula " Istória sarda istória d’Itàlia…";

Dot. Giovanni Serreli  " Su ruolu políticu e econòmicu de Seddori intra su Mediuevu e s’Edadi Moderna";

Dot.ra Maria Grazia Mele " Is Fradis Barbarossa e sa Sardigna a su tempus de Ferdinando “Il Cattolico”;

Dot. Edward Gregory-Jones " Cuncu cunsideru asuba de su sistema de difesa de su golfu de Casteddu me in su séculu 18";

Dot.ra Simonetta Sitzia " Sa Crésia sarda intra is sèculus 14 e 18"

Dot. Giuseppe Seche " Su Giudicau d’Arborea in sa Sardigna de su Trexentus, un’Istadu in guerra";

Dot.ra Annalisa Caboni  "Cuncu consideru asuba de is istitutus prus importantis de su “Rénniu de Sardigna”.