SARDU

Comunu de Gùspini: Su tzírculu Auser de Guspini, in collaboratzioni cun l’ANPI Sardegna, organizat su 1 de Abrili s’initziativa:

“Donne della Resistenza, Madri della Costituzione, Itinerari di Democrazia”

In ocasioni de su de setanta anniversàrius de s’intrada in vigéntzia de sa Costitutzioni Italiana, s'initziativa torrat a proponni in Gúspini puru s’ammosta  curada in totu de s’ANPI SARDEGNA, Assótziu Natzionali Partigianus, fundada de is partecipantis a sa resisténtzia italiana contras a s’ocupatzioni nazifascista, e ancora oi in prima línea in s’amparu de s’atuatzioni de sa costitutzioni, in sa defensa de sa democratzia e in sa promotzioni de sa memória de cussa tèmpora manna de cunchista e libbertadi chi est stétia sa Resisténtzia: unu tema atuali meda in dii de oi.  

S’ammosta no est sceti una tzelebbratzioni, ma si ponit sa tarea de cuberai sa memória e aviai un’arrexonamentu apitzus de sa stória de sa democratzia nosta.

Ddu fait torrendi a cracai, imperendi a manera scípia màginis e fueddus, is tretus de sa caminera democràtica: de sa Resisténtzia a su diritu de votu de is féminas, fintzas a sa stérrida de sa carta costitutzionali, chi at rapresentau s’aviu de una produsidura legislativa orientada a s’afortiamentu de is diritus tzivilis, políticus e sotzialis. In sa ricostrutzioni de is camineras de democratzia, s’ammosta profundat s’arrolu tentu de is féminas, siat in sa resisténtzia siat in s’Assemblea Costituenti; un’arrolu chi fintzas a pagu tempus a oi no fiat pigau meda meda in consideru de sa storiografia, e invécias is stúdius prus modernus ndi funt boghendi a pillu s’importu e sa tzentralidadi.

S’ammosta stràngiat 15 tàulas de letura fàcili, chi andant beni meda po totus, pratzius in argumentus temàticus generalis (is partigianas, su diritu a su votu de is féminas, is diritus de is féminas, s’8 de Martzu) e atrus dedicaus in su specíficu a su contribudu de unas cantu mammas costituentis, evidentziau de is leturas de is interventus fatus in is trabballus in s’assemblea o in is commissionis, e acumpangiaus de biografias lestras de is deputadas.   
Intra is féminas costituentis no podiat ammancai Nadia Gallico Spano (mulleri de Velio Spano), apegada meda a sa Sardigna e a Gúspini, chi de pagu dd’at dedicau una pratza. In su libbru autobiogràficu suu “Mabruk” contat cun orgólliu su cumítziu fatu in is scalas de sa Crésia San Nicolo’. Est intra is organizadoras de su 1° cungressu de is féminas sardas, chi ant afestau is cent’annus própiu ocannu e precisamenti su 9 de martzu apena passau.

Sa presentada de s’ammosta est curada de sa Visu presidenti de s’ANPI SARDEGNA Luisa Sassu e de su Presidenti de s’ANPI Médiu Campidanu Carlo Marras.