SARDU
Comunu de Carbònia: Sa Setzioni de Stória Locali de su Sistema Bibliotecàriu de sa Maurredia (SBIS) fait 30 annus, e su Comunu de Carbònia est s'enti cabufila. Crasi, cenàbara 1° de Martzu, a is cincu e mesu de a merí (17,30), in sa sea de sa "Officina Meccanica" bécia, chi s'agatat anche sa Grandu Miniera de Serbariu, si afestat cust'anniversàriu de importu mannu in s'interis de su cunvénniu intitulau "La Setzione di Storia Locale si racconta ...".
"Est una strutura, chi de su 1989 rapresentat unu puntu de riferimentu po is circadoris e po is studiosus in su cuntestu de s'arregorta, de sa schedatura, de sa catalogatzioni e de sa gestioni de materiali documentàriu locali de interessamentu stóricu de importu mannu" at nau sa Sindaghissa Paola Massidda.
Cumenti at pretzisau s'Assessora a sa Cultura, Sabrina Sabiu "Su trabballu fatu de custa strutura est de fundamentu aici cumenti cussu fatu de is stóricus localis chi bint atesu, chentza s'agiudu cosa insoru difatis iaus a ai pérdiu testimóngius de importu chi si permitint de cumprendi mellus su passau retzenti cosa nosta".
Is fundus documentàrius e fotogràficus, is tesis de làurea e totus is àterus documentus allogaus in sa Setzioni de Stória Locali riguardant fatus de importu de sa vida sotziali, económica e política de is Comunus chi faint parti de su "SBIS"
Is documentus allogaus torrant agou de oi fintzas a su 1695.
A su cunvénniu de crasi, "La Sezione di Storia Locale si racconta ..." pigant parti sa Sindaghissa, Paola Massidda, e s'Assessora a sa Cultura, Sabrina Sabiu. Funt previdius puru is interventus de Maria Giovanna Murgia, archivista de sa Setzioni Stória Locali, de Luisa Anna Marras, ex Dirigenti Regionali; de Antonangelo Casula, ex Síndigu de Carbònia, e de Paolo Costa, ex assessori a sa Cultura de su Comunu de Carbònia.