SARDU
Comunu de Gùspini: Su Comunu de Gùspini afestat su de 74 anniversàrius de sa Resisténtzia e de sa Libberatzioni de su nazifascismu cun sa proietzioni de su film documentàriu "Libere" de Rossella Schillaci, in programma cenàbara 26 de Abrili, in is Domus a Corti, a ses e mesu de a merí (18,30).
Prodúsiu de s'Arcivu natzionali tzinematogràficu de sa Resisténtzia in su film funt is fémminas e is partigianas etotu- intra de custas Joyce Lussu- a contai sa libberatzioni de su nazifascismu, sa mantzebadura, sa conchista de sa libbertadi e su dopoguerra po médiu de su montàgiu fatu a arti de su materiali de arcivu, de testimóngius originalis, de immàginis stóricas, de tzinegiornalis, de propaganda, de microfilm.
Su film donat una primu arrespusta a sa pregunta cali est stétiu su rolu de is fémminas in sa Resisténtzia italiana. Po sa passioni, po s'impellida idealista e agualitària de cuss'esperiéntzia, sa lota po sa Libberatzioni is partigianas dd'ant bívia puru cumenti un'aina de circa de sa libbertadi cosa insoru: difatis est de cussu momentu chi iant inghitzau a pediri paridadi in su trabballu e in sa famíllia. Unu film profundu e craru in is cuntenutus e in is messàgius.
"Un'arregordu respetosu, un'apellu apassionau e filológicu a non donai mai po scontada sa Libbertadi - scrit sa crítica tzinematogràfica Raffaella Giancristofaro in "My movies" - e a non dd'acabbai mai de si impinniai po unu mundu diversu".
Sa proposta fait parti de sa rassínnia "#culturaction" prumóvia de s'Assessorau a sa Cultura de su Comunu de Gùspini imparis cun sa Prolocu Gùspini.