SARDU

Comunu de Santu 'Èngiu: Fonti: "La Gazzetta del Medio Campidano": A pustis de annus medas, prus de dexi, finalmenti at a torrai a aberri s’anfiteatru comunali de Santu’Èngiu, chi at otènnidu de pagu su tzertificau po sa preventzioni de is intzèndius.
In custa manera acabat una vitzenda durada tropu tempus po una strutura pagada giai unu millioni e mesu de èurus de dinai europeu a is cali ant aciuntu atru dinai de su Comunu, 200 milla, e atrus 250 milla chi serbiant po is manutentzionis e sistematzionis de cust’òpera. Aici torrat a nai su Sìndigu Carlo Tomasi: «S’anfiteatru de Santu’ Èngiu at tentu una esistèntzia trumentada. Custa strutura architetònica de valori mannu dd’ant costruida tra su 2004 e su 2005 po essi a pustis inaugurada su 27 de argiolas de su 2011 de su Sìndigu de cussu annu Giovanni Cruccu. A dolu mannu, in segus a s’inauguratzioni, s’anfiteatru dd’ant dèpiu serrai luegus poita ca ammancànt is tzertificatzionis tècnicas. Custa amministratzioni at portau a innatis s’obietivu de ndi fai bessiri s’anfiteatru de sa lista de is “òperas no acabbadas”, e duncas at fatu de totu po superai is dificultadis econòmicas, burocràticas e tècnicas. In prus depeus cunsiderai puru is duus annus de pandèmia de Covid 19. Eus agatau su dinai chi serbiat po is manutentzionis de s’anfiteatru e seus arrennèscius a otenni su tzertificau de preventzioni Intzèndius (Cpi), ùtili po aberri sa strutura a manera definitiva e no a ratas. Aici su Comunu at agatau 70 milla èurus netzessàrius po is interventus de ripristinu de sa strutura. «In su matessi tempus – aciungit su primu tzitadinu – eus fatu is riunionis innoi si funt cunfrontaus is membrus de sa commissioni comunali de vigilàntzia asuba is localis de spetàculu pùblicu, imbiendi a su Cpi, de sa valididadi de 5 annus e chi si podit rinnovai. Finalmenti sa strutura si podit utilizai. S’assessori Nicola Ennas at sighiu, cun impinnu meda, totus is passàgius finas a su traguardu». Ma po su cunsilleri comunali Stefano Altea su tempus chi si est pèrdiu est meda: «Su ai tentu serrau s’anfiteatru po otu annus rapresentat unu dannu mannu po sa comunidadi. Un’amministratzioni efitzienti depiat essi postu luegus su dinai netzessàriu po arrisolvi is problemas e utilizai su beni. In custa manera is spesas funt stètias medas: sa comunidadi e su  territòriu funt stètius privaus de unu polu culturali importanti».
Asuba sa chistioni intervienit puru su cunsilleri Stefano Musanti: «De assessori in su 2015 in commissioni vigilàntzia at traballau a su protzedimentu de su Cpi de s’anfiteatro e de su teatru, semplifichendi sa protzedura. Immoi abisòngiat organizai sa gestioni de s’anfiteatru. Spereus de arrenesci a dda fai allestru».