SARDU

Comunu de Seddori: Su Polu Museali de su Comunu s’ammanniat. Mèrcuris su 5 de mesi de ladàmini a is ses e mesu de a merì in s’aposentu de su Cunventu s’at a tenni sa tzerimònia po s’abertura de su Museu Stòricu Etnogràficu de is Padri Cappuccini. Gràtzias a custa incingiadura su Polu Museali Seddoresu, formau de su Casteddu e de su Museu de su Pani, si arricat de una atra sea espositiva, chi afortiat sa proposta culturali de sa tziatdi de Seddori e avalorat sa promotzioni turìstica de su territòriu. < A pustis de unu traballu mannu e longu, su Comunu portat a innantis sa gestioni integrada de su Museu de is Padri Cappuccini cun is atrus museus de sa bidda – si narat su Sìndigu Alberto Urpi – Aici podeus amanniai s’oferta turìstica e su Comunu si fait càrrigu de totus is museus de sa bidda. Seus fadendi unu traballu de importu mannu po allogai e avalorai s’oferta museali po ddus motivus printzipalis: po no perdi su patrimòniu stòricu-culturali nostu e po ddu promovi cun su turismu>. Su Museu Stòricu Etnogràficu de is Padri Cappuccini nascit a s’acabbu de is annus ’70 de su sèculu passau e arricit arredus sacrus, ricostrutzionis de is atividadis passadas e de is cunventus e una colletzioni importanti de repertus archeològicus (is prus antigus funt de su Neolìticu) e ndi arribant pruschetotu de su territòriu de Seddori. Su museu est organizau in tres setzionis, e cussa dedicada a is arredus sacrus est sa prus pretziosa. Is ogetus, is paramentus, is cuadrus e is relicuiarius contant sa stòria de s’arribu de is Padri Cappuccini in Sardigna. Prus de cuatru sèculus de atividadi me is cunventus chi s’agatant in totu s’ìsula de inno ndi arribat s’ arregorta originali. Sa sigunda setzioni est etnogràfica e ddoi funt amostaus is ogetus chi is paras umperant me is atividadis de dònnia dì. Intra custus tocat a nomenai cussus de s’arrelogeria, de sa cali fiant maistus, de sa potecaria e de sa butega de su maistu de linna. In sa de tres setzioni agataus una arregorta de repertus archeològicus chi ndi benint de su Neolìticu e de su medioevu artu.