SARDU

Comunu de Santu’ Èngiu: Fonti: "La gazzetta del Medio Campidano": «Seu assortau meda cumenti a Sìndigu a tenni custa realidadi importanti, ca ocannu puru amostat nòminis de calidadi», si narat su Sìndigu Carlo Tomasi. «Ddu nau dònnia annu: cumenti boleus andai a innantis e melliorai? Su Festival est una realidadi fundamentali po sa comunidadi e po su territòriu. Biri personas ca arribant puru de Tàtari po is presentatzionis, cumenti est sutzediu cida passasa, est una cuntentesa manna. S’invitu cosa mia est cussu de partetzipai poita sa cultura est giai resilièntzia, unu fueddu chi si fait pensai a su Pnrr. Bivi sa cultura si donat una autostima e una percetzioni diferenti de nosu e totu e de sa comunidadi nosta». Ant torrau gràtzias a s’assessori Nicola Ennas, ca est puru presidenti de s’Assòtziu Entis Localis po is Atividadis Culturalis e de Spetàculu, po Francesca Spanu e po totus is personas chi collaborant a s’aprontadura de su Festival. Prexau puru Nicola Ennas: «A pustis de tres annus de collaboratzioni intra su Comunu e su staff cun sa ghia de Francesca Spanu, su Festival s’ammanniat in calidadi cun sa gestioni donada a s’Assòtziu Entis Localis po is Atividadis Culturalis e de Spetàculu, asuta sa diretzioni artìstica de Francesca Spanu e Giovanni Follesa, ca ocannu pretzint su ruolu», dichiarat. «Totu custu fait cresci su Festival sigundu su chi s’amministratzioni comunali at circau de fai finas de sa primu editzioni: aprontai una oportunidadi noa po sa bidda. Su Comunu at donau unu agiudu mannu, puru econòmicu, impari a sa Fondatzioni de Sardigna. Eus pigau parti puru a unu atru bandu ca si permit de aciungi calidadi a su Festival. S’argumentu de ocannu, “Fuoriclasse e Fuoriserie”, amostat is modalidadis cun is calis is personas arricint is informatzionis: «Sa televisioni est a dì de oi su mesu prus popolari po contai una stòria», si nant Giovanni Follesa e Francesca Spanu. «A beru su fueddu scritu abarrat immutàbili, ma sa narratzioni cun immàginis est de importu mannu. Librus e stòrias televisivas funt fatus de matèrias diferentis ma totus e duus conchistant a sa genti». «Cumenti naràt Jean-Paul Sartre: “unu òmini est sempri unu contadori de stòrias”. E sa vida tenit abisòngiu de òminis e fèminas chi dda podint contai. E pruschetotu de personas disigiosas de ascurtai custus contus». «Ocannu in su Festival ddoi ant a essi labboratòrius de scritura e letura e puru sa possibilidadi po is scritoris, nous e no, de atobiai editoris e agentis literàrius», serrant Follesa e Spanu. Ant a essi cincu diis prenas de atòbius, presentatzionis e labboratòrius innoi ant a pigai parti esponentis importantis de sa literadura e de su giornalismu po si cunfrontai asuba is librus, su tzinema, ma puru asuba chistionis sotzialis importantis e de atualidadi. Madrina de sa de tres editzioni at a essi sa scritora Roberta Balestrucci Fancellu, giai connota po sa partetzipatzioni sua in calidadi de òspiti me is editzionis pretzedentis, chi a s’acabbu de dònnia presentatzioni at a fai una pregunta a su scritori/a òspiti.

S’ORGANIZATZIONI

S’atòbiu est organizau de su Comunu de Santu Èngiu in collaboratzioni cun s’Assòtziu Entis Localis po is Atividadis Culturalis e de Spetàculu, s’Assòtziu Festival Literàriu de su Monreali, su Sistema Bibliotecàriu Monte Linas, cun s’agiudu de sa Regioni Autonòma de sa Sardigna, de s’Assessorau de s’Istrutzioni Pùblica, Benis culturalis, Informatzioni, Spetàculu e Sport e de sa Fondatzioni de Sardigna. Po totu sa durada de su Festival ddoi at a essi sa libreria Edumondo de Casteddu cun su bookshop suu.

 SU PROGRAMMA

Su Festival Literàriu de su Monreali at a inghitzai mèrcuris su 6 de argiolas a is seti de a merì in sa Domu Mereu cun is saludus de s’amministratzioni comunali, de is diretoris artìsticus Francesca Spanu e Giovanni Follesa. At a presentai po totu su Festival Alberto Ibba. Sa serada at a sighiri cun sa presentada de su romanzu “Eden”, de Sara Bilotti. Ant a chistionai cun sa scritora Alessandro Marongiu e Francesca Spanu. A is otu de a merì, atòbiu cun s’autori Gianni Usai chi at a chistionai cun Romano De Marco de su romanzu “Cristian T.” A is dexi mancu unu cuartu de noti Matteo Strukul at a amostai s’ùrtimu romanzu suu “Il cimitero di Venezia”. S’atòbiu est organizau cun s’agiudu de su Club de Jane Austen Sardigna. A chistionai cun su scritori at a essi sa diretora artìstica de su Club Giuditta Sireus.

Giòbia su 7 de argiolas a is seti de a merì, s’at a inghitzai cun s’atòbiu “Guida astrologica per cuori infranti”: de su romanzu a sa serie tv (donau in Netflix). Cun sa scritora de su libru Silvia Zucca ant a chistionai Francesca Spanu e Cristina Caboni. A sighiri, Romano De Marco at a presentai s’ùrtimu romanzu suu “La casa sul promontorio” cun Andrea Fulgheri. A is noi oras de noti, atòbiu cun “La casa di carta: strutture narrative e influenze letterarie della serie tv che ha conquistato il mondo”, organizau po contu de s’assòtziu Argonautilus, organizadora de su Festival de su libru de Igrèsias. In s’ùrtimu atòbiu de sa dì, a is dexi mancu unu cuartu de noti, ddoi at a essi Giovanni Follesa cun Stefano Tura chi ant a chistionai asuba de su giornalismu italianu e stràngiu.

Cenàbara s’ 8 de argiolas, a is seti de a merì, ddoi at a essi sa presentada de su scritu de Roberto Carnero “Pasolini. Morire per le idee”. At a chistionai cun su scritori Alessandro Marongiu. A is otu ddoi at a essi Chiara Moscardelli cun su romanzu suu “La ragazza che cancellava i ricordi”. Sa scriotora at a chistionai cun Francesca Spanu e Romano De Marco. A is noi oras, Sara Gazzini s’at a cunfrontai cun Luca Briasco asuba s’òpera “Laura Antonelli. L’amore, l’incanto, l’oblio”. At a serrai sa serada Daria Bignardi, a is dexi mancu unu curtau, chi presentat “I libri che mi hanno rovinato la vita” cun Giovanni Follesa e Romano De Marco.

Sàbudu su 9 de argiolas, in sa Domu Mereu ddoi at a essi su cuncertu de s’istadi de sa banda musicali Tzitadi de Santu’ Èngiu.

Domìnigu su 10 de argiolas. A is seti de a merì, Angelo Mazza at a presentai su romanzu suu “Tascabile indimenticabile” cun Gianni Usai. A pustis, Gabriella Genisi at a essi òspiti in s’atòbiu “Lolita Lobosco, dai romanzi alla serie tv”. Ant a chistionai cun sa scritora Francesca Spanu e Rossella Perra. A is noi oras de noti, su cunfrontu intra Giovanni Follesa e su regista Alessandro D’Alatri asuba sa literadura, su tzìnema e is stòrias a puntadas de sa televisioni. Po acabbai dj set cun sa mùsica annus ’80 seletzionada de Nicola Cancedda.

Su 6 de austu, a is seti de a merì, Francesco Abate at a presentai “Il complotto dei Calafati”. At a chistionai cun su scritori Giovanni Follesa. A is otu, Francesco Abate at a arraxonai cun Valerio Aprea, chi a is noi oras de noti at a presentai su reading suu asuba Mattia Torre.

Su 17 de cabudanni, a is noi oras de noti, in collaboratzioni cun sa Cummissioni Oportunidadis Paris de su Comunu de Santu’ Èngiu, ddoi at a essi una arrexonada asuba is unionis tzìvilis.

Totus is atòbius de su Festival s’ant a fai in sa Domu Mereu.

LABBORATÒRIUS

Intra is atòbius de su Festival ddoi ant a essi unus cantu de labboratòrius a indonu: su cursu de letura espressiva cun sa maista Laura Fortuna, su labboratòriu asuba is stòrias a puntadas de sa televisioni (serie tv) aprontau de Romano De Marco e Andrea Fulgheri, su cursu de scritura creativa. Totus is labboratòrius funt a nùmuru serrau. Tocat duncas a s’iscriri cun d-una e-mail a festivalletterariodelmonreale@gmail.com. Ddoi ant a essi puru atòbius cun is agentis literàrius Loredana Rotundo, Luca Briasco, Alessandro Marongiu e cun su staff de Wom Edizioni.

FESTIVAL OFF

Cumenti a dònnia annu, is eventus de su Festival Off si faint innantis e a pustis de sa manifestatzioni printzipali. Ant inghitzau s’11 de làmpadas cun Mauro Marcialis e su romanzu suu “Roma calibro zero” e ant a sighiri su 17 de làmpadas cun Cristian Mannu, chi at a presentai cun Giuditta Sireus su romanzu “Ritratto di donna”. S’eventu, aprontau in collaboratzioni cun su Club de Jane Austen Sardigna, s’at a fai a is seti de a merì in sa Domu Museu Dona Maxima. A pustis, su “Processo per Grazia Deledda”. Unu atòbiu originali cun Gianni Caria ca at a essi su Giuigi, Alessandro Marongiu, ca at a fai s’Accusa, Ilaria Muggianu Scano po sa Difesa e Francesca Spanu chi at a essi sa Cancelliera.

S’ùrtimu atòbiu innantis de su Festival s’at a fai sempri in sa Domu Museu Dona Maxima su 30 de làmpadas a is seti de a merì cun Piergiorgio Pulixi e su romanzu suu “La settima luna”. At a chistionai cun sa scritora Francesca Spanu.