SARDU
Comunu de Arresi: De su 7 a su 9 de Cabudanni nc' est sa Rassínnia Cinematogràfica "AngoLazioni" segunda editzioni. Omàgiu a Vittorio De Seta, diretzioni artística de Mohamed Challouf. Sa rassínnia si fait su 7 e su 9 de Cabudanni in sa Villa Piercy, in Porto Pinu, e su 8 de Cabudanni in Pratza Nuraghe. Tocat a si prenotai tzerriendi a su númunu 351 9822381 de 9.00 - 12.00 e de 17.30 – 20.30.
Custa segundu editzioni de sa Rassínnia "AngoLazioni" est un'atu de reconnoscéntzia in is cunfrontus de Vittorio De Seta, unu grandu Maistu de su tzínema italianu, atentu meda a su mundu de is messajus e a is traditzionis. S'at lassau unu patrimóniu tzinematogràficu stravanau girau pruscatotu intra de sa Sitzília, terra nadia cosa sua, e sa Sardigna.
Unu atu de reconnoscéntzia obrigatóriu a custu artesanu impinniau in su tzínema documentàriu giai chi "AngoLazioni2" est dedicada a su tzínema de sensibbilizatzioni, a sa bio diversidadi e a sa torrada a sa natura non scéti in Itàlia ma puru in àteras partis de su mundu ( Burkina Faso, Tunisia, Canada ...).
Custa rassínnia tzinematogràfica dda organizat su Comunu de Arresi imparis e cun s'agiudu de sa "Cineteca di Bologna", "La Società Umanitaria", s'Istitutu de Cultura Italianu in Tunisi, sa Regioni Sardegna e tenit cumenti a Diretori Artísticu su regista tunisinu Mohamed Challouf. Sa rassínnia bolit èssiri unu momentu po spertai su sentidu tzívicu e de cuncàmbia intra de is partitzipantis asuba de argumentus chi riguardant s'amparu ambientali e is possibilidadis de melliorai sa vida de donniunu e de su pianeta.
"AngoLazioni" segunda editzioni chi si fait de su 7 a su 9 de Cabudanni 2020 proponit a su púbricu una série de "film" chi benint de Paisus diferentis e chi funt motivu po nosu de arrexonamentu in custa crisi pandémica mundiali gravi po si fai un'esàmini de cusciéntzia asuba sa situatzioni ecológica innui seus bivendi.
Po fai un'atu de reconnoscéntzia simbólicu a su grandu Maistu Vittorio De Seta eus scioberau tres cortometràgius cosa sua de sa série "Mondo Perduto" chi ddus at restauraus sa "Cineteca di Bologna" in su 2008 e chi po s'ocasioni si ddus ponit a dispositzioni. Is tres cortometràgius funt: " Lu tempu di li pisci spata" 1955, "Pastori di Orgosolo" 1958, e "Parabola d'Oro" 1955, tres trabballus de primori de Vittorio De Seta e de su tzínema documentarísticu italianu.
Su programma de ocannu proponit puru a su púbricu su film "Antropocene", regia de Jennifer Baichwal, Edward Burtynsky e Nicolas de Pencier. Custu tres autoris, de órigini canadesa, atentus a is argumentus chi pertocant s'ambienti, si faint girai su mundu po s'ammostai cumenti is atividadis umanas lassant un'arrastu fungudu e chi giai mai si ndi podit tirai in sa stória giológica e climàtica de s'únicu pianeta chi teneus. "Antropocene" s'edadi de s'Ómini est unu grandu testimóngiu de custu momentu críticu de s'Umanidadi chi a bellu a bellu est sperdendi sa terra.
"L'Agnello", custu lungometràgiu ddu dirigit Mario Piredda e contat sa stória personali e dolorosa de una famíllia e de su raportu intra de s'Ómini e s'ambienti. Innòi su raportu ddu cunditzionat una basi militari. Una maladia lenta e chi non donat scampu e chi si cumbatit circhendi de non perdi sa spera. Unu film cumoventi e interessanti chi a partiri de una picioca, Anita, portat a arrexonai cun dilicadesa asuba de un'argumentu de is tempus cosa nosta chi riguardat sa saludi de totus.
Sa de tres seradas de "AngoLazioni" segunda editzioni chi si fait su 9 de Cabudanni est dedicada de unu totu a s'Àfrica po médiu de duus film stravanaus asuba de su Burkina Faso e sa Tunisia. Su primu intitulau "Burkinabe Bounty, Agroecology in Burkina", unu cortometràgiu de 35 minutus de sa regista Iara Lee (Culture of Resistance films)", chi contat cun grandu energia e po médiu de imàginis bellas meda, sa resisténtzia agrícola e sa lota po sa soberania alimentari in Burkina Faso, unu de is Paisus prus póburus de su mundu, chi s'agatat in su "Sahel" africanu. Su film ponit s'atentzioni intra de is àteras cosas asuba a cumenti is fémminas de su Paisu si impínniant po guadangiai s'indipendéntzia económica e a cumenti is gióvunus manifestint peri is bias po cuntrastai su "business" de is multinatzionalis cumenti a sa Monsanto.
"Burkina Bounty" est unu film asuba puru de is maneras creativas chi is populatzionis umperant po ndi torrai a pigai su cuntrollu asuba de sa cosa de papai, de is séminis e de su benidori cosa insoru.
Su segundu film po sa serada de su 9 de Cabudanni est "Couscous il grano della dignità" de su regista Habib Ayeb (Tunisia 2017) est unu biaxi spetziali in sa Tunisia de oi. Sa chi in s'època de s'Imperu Romanu dda tzerriànt "Su granali de Roma". Oramai totus scint chi su "Couscous" est sa basi alimentari de totus is paisus de su Maghreb. Custu documentàriu si cuntzentrat asuba de is cunditzionis políticas, sotzialis, económicas e ecològicas innui si produsit su trigu tanti apretziau po sa preparatzioni de su Couscous. Unu film chi circat de ammostai chi s'aspetu alimentari est de fundamentu in is chistionis acapiadas a sa dinnidadi umana.
S'Amministratzioni Comunali torrat gràtzias a sa Famíllia Corridori po ai postu a dispositzioni Villa Piercy innui su 7 e su 9 de Cabudanni si fait sa rassínnia.
segreteria@comune.santannaarresi.ca.it
34779534075 (Elisabetta Rossu, Assessora Istrutzioni Púbrica, Políticas Sotzialis, Cultura, Universidadi);
0781 9669208 (Martina Uccheddu, Responsàbbili Àrea Amministrativa).