SARDU
Comunu de Arresi: Gióbia 20 de Austu, in Arresi, in su Tzentru de Agregatzioni Sotziali, in bia G. Mariano, a is otu de a merí (20.00) nc'est sa presentada de su líbburu “Giallo Sardo” de autoris vàrius. Est presenti Eleonora Carta, una de is autoris. Po pigai parti a sa presentada non si pagat ma tocat a si prenotai.
Respetendi is normas de preventzioni contras a su Covid-19 s’intrada est cuntrollada e duncas po non fai ammuntonamentus, tocat a si prenotai mandendi una e-mail a: cultura.sarda2020@gmail o telefonendi a su númunu: 3890191709. Sa presentada dda organizat s'Ufítziu de Língua Sarda de su Comunu de Arresi, finantziau cun su dinai de sa Regioni Autònoma de Sardigna cunformas a sa L. 482/99 “Normas in matéria de amparu de is minorias linguísticas stóricas.
Su líbburu
Cumponint s'antologia 10 contus scritus de 11 autoris: Marcello Fois, Francesco Abate, Ciro Auriemma e Renato Troffa, Eleonora Carta, Fabio Delizzos, Elias Mandreu, Carlo A. Melis Costa, Piergiorgio Pulixi, Ilenia Costa, Gavino Zucca.
Cumenti a dónnia antologia, "Giallo Sardo" puru ponit imparis una bariedadi de stilis e de maneras narrativas chi atóbiant is gustus prus diferentis.
" A s'inimigu parare, a sa giustítzia fuire"
Un'Ísula de delitus, de disacatus e scrucullius. Una terra arrica de naróngius ferotzis, acontéssius misteriosus e aventuras atrividas. Bandius e sicàrius, mortoris chentza piedadi e informadoris, furonis e secuestradoris ostacolaus de investigadoris tostorrudus, politziotus spaciaus de su trabballu, carabbineris scrétius ma non po custu prus pagu prontus a cumbati s'avantzada de sa dilincuéntzia, bruscias chi castiant e càmbiant sa sorti de is òminis e vitimas innotzentis chi ponint sa vida cosa insoru in is manus sballiadas. De su "thriller! a su spionàgiu, de su politziescu fintzas a su "noir" stóricu, a sa Sardigna dd'ant contada medas bortas is tramas de su "giallu". E po sa primu borta una grefa de scritoris sardus (chi in sa carriera cosa insoru si funt cunfrontaus cus sa narrativa de generi) si funt atóbiaus a pari po donai a is letoris unu mosàicu de stórias diferentis ambientadas in sa terra cosa insoru. Dónnia contu unu logu, una províntzia, una língua chi portant su letori in unu labberintu chi non si podit sboddicai de costumàntzias, superstitzionis, trogas e delitus perfetus o giai.