SARDU
Comunu de Arresi: Sàbudu 8 de Austu 2020, in su Tzentru de Agregatzioni Sotziali, in bia G. Mariano, a is otu de a merí (20.00) nc'est sa presentada de su líbburu “Metropolitània e àteros contos tòpicos, distòpicos e utòpicos” de Giuseppe Corongiu. Respetendi is normas de preventzioni contras a su Covid-19 s’intrada est cuntrollada e duncas po non fai ammuntonamentus, tocat a si prenotai mandendi una e-mail a: cultura.sarda2020@gmail o telefonendi a su númunu: 3890191709. Sa presentada dda organizat s'Ufítziu de Língua Sarda de su Comunu de Arresi, finantziau cun su dinai de sa Regioni Autònoma de Sardigna cunformas a sa L. 482/99 “Normas in matéria de amparu de is minorias linguísticas stóricas.
Su Romanzu
Funt doxi contus erèticus, chi non t'abetas de ligi scritus in sardu.
Unu mosàicu narrativu de una terra de identidadi forti chi in manera inevitàbili bessit unu non logu, un'espressioni giogràfica truessada cun ferotzidadi de is cuntraditzionis de is tempus de oi. De is scenàrius distòpicus de una fantasciéntzia scéti simbòlica, a is sunferéntzias atualis, cun abbisitas in su passau de is annus Otanta-Noranta de su séculu passau o in su benidori non meda atesu po scruculliai is rexonis de su sciacu culturali e sotziali de unu pópulu chi parit apat pérdiu sa bia.
Non ddoi at prus arrastu de sa Sardigna antropológica, rurali e mítica.
Sa sardidadi est bessida unu fatu globali o distopia orrorosa. Movit is mostrus e is sentidus de unu laboratóriu literàriu cracu de passioni, surrúngiu, denúntzia, gana de torrai a binci, speràntzia mai sparéssia.
De su líbburu, chi fintzas a oi at tentu críticas positivas, ant nau chi est un'òpera coragiosa e erética, spantosa, schitzofrénica e sperimentali. Totus funt, perou, de acórdiu chi est unu líbburu de importu po sa literadura in língua minoritària e chi aberrit una bia noba. Su mosàicu narrativu andat de sa fantasciéntzia a s'erotismu, aunit realidadis tzitadinas e biddas, scrucullat mundus fedalis cumenti a su de sa política, de su giornalismu, de su mundu culturali sardu.
Sa língua umperada si proponit cumenti a língua culta, fini, identitària, comuna a totu s'Ísula ma chi si ligit beni. No est unu líbburu scéti po is espertus antzis si ndi stésiat de is schemas académicus e antropológicus de una certa sardística culturali e cunformística chi andat faci a su "folk".
S'autori
Giuseppe Corongiu est nàsciu in Lacòni in su 1965. Bivit in Casteddu, dirigenti púbricu, giornalista, sagista. Giai de s'incras de s'aprovu de sa L.482 chi at arreconnotu su sardu che língua dínnia de amparu, est stétiu ativu meda in su movimentu de prumotzioni de sa língua sarda. Est stétiu responsàbili de sa política linguística de Sa Regioni Sardigna de su 2006 fintzas a su 2014. At pubricau unus cantu sàgius e intra de custus "Il Sardo una lingua normale" in su 2013. De pagu at furriau in sardu is fàulas po pipius de Gramsci e scritu unu contu po arremonai su biaxi in Sardigna de Herbert David Lawrence chi fait parti de s'arregorta " Back to Sardinia".