SARDU
Comunu de Arresi: S'Amministratzioni Comunali de Arresi at organizau su 17 de Austu, in prazta Nuraghe, a is noioras de a noti (21.00) sa rapresentatzioni teatrali "Corpi al vento", portada in scena de "Il Crogiuolo". Is interpretis funt Ilaria Gelmi e Antonella Ruggiero e ddas dirigit Roberto Anglisani.
Po respetai is dispositzionis contras a sa spartzinadura de su Covid-19, s'intrada est cuntrollada e duncas tocat a si prenotai tzerriendi a su númunu: 3348821892.
Una stória antiga contada de duus corpus e duas boxis chi si impastant, si separant, si intritzant, si ponint una asuba de s'àtera, fintzas a bessiri unu corpus e una boxi scéti.
Una mamma, Pasifae, sa mamma de su Minotauru; Arianna, sa primu filla, connota po nexi de su filu chi iat fatu bessiri Teseo de su labbirintu; Fedra sa segundu filla, una fémmina chi non podit aguantai una passioni chi ndi ddi bessit de aintru. Fèmminas cretesas. "is luxentis" ddas tzerriant, totus acomunadas de sa matessi sorti. Totus débbilis ananti a is passionis de s'amori, totus vítimas de su matessi frastimu. Dilicadas che argidda. Nosu, fèmminas seus totus fatas de argidda. Unu mitu cràssicu torrau a manixai in manera personali, femminina, irònica e fedali.
Su trabballu de circa est inghitzau cun sa stória de Fedra, filla de Minosse e Pasifae, printzipissa de Creta, apustis mulleri de Teseo rei de Atene. Contai de Fedra po scruculliai sa passioni cosa sua po su fillastu Ippolito, fueddai de sa vida cosa sua cumenti si fiat una fémmina de is tempus nostus. In custu caminu de stúdiu is duas atoras/autritzis ant aprofundau sa connoscéntzia de totus is fémminas chi faint parti de sa stória de Fedra, arribbendi a cumprendi chi po fueddai de su dramma de custa tocàt a marolla fueddai de totus is fémminas chi dda ingiriant. Poita de mamma in filla, is stórias si arrepitint! Diaici po médiu de sa mirada e su pentzamentu de Fedra su spetàculu contat de Pasifae puru, sa mamma, e de sa passioni cosa sua po unu malloru biancu. Contat puru de Europa, s'ajaja, chi stràngia fiat lómpia in s' ísula de Creta po bessiri reina; de Arianna, sa sorri, sbandonada in Nasso de Teseo; de Antiope, sa reina de is Amazonis, issa puru vítima de is trumentus de amori. Creta est su bartzolu de custa stória, un'ísula ingiriada de su mari: su Mediterraneo. Su mari puru est protagonista in custu contu, po médiu de su mari s'amori lompit o si nci andat.
"Corpi al vento" contat custas stórias, permitit a su púbricu de ddas osservai, de si nci arreconnosci, ca is stórias si arrepitint de mamma in filla, de filla in mamma ma si podit scerai de segai su filu.