SARDU
Comunu de Ìsili: Funt duus fueddus chi faint pentzai luegus a is atividadis printzipalis chi ĺsili est connota in Sardigna e a foras de Sardigna. S’arti de s’arràmini e de su tessíngiu funt is prendas nostas, su billetu de bísita prus bellu de una comunidadi chi si aberrit, chi bollit arriciri, e chi cumbidat a scoberri su chi su territóriu suu tenit de donai. Is ortus produsint un’arrichesa chi benit de sa naturalesa e de una cultura laurera antiga chi at scípiu amellorai in diretzionis noas fintzas a diventai un’àteru scusórgiu de balori chi no si podit stimai.
“Artis e Ortus” est sa dii acontéssiu de s’atóngiu isilesu.
Su 2 de Meseladàmini ĺsili aberrit is portas a is abitantis suus, a is bisitadoris, a is turistas e a is curiosus, donendi vida a un’apuntamentu anca arrapresentai una fotografia de su territóriu e de is particularidadis de su Sarcidanu Brabaxa de Seulu.
Unu percussu eciseri peri bias e is currungonis de su tzentru stóricu isilesu at a acumpangiai su bisitadori a scoberri, atobiai e apretziai is primorias de s’artesanau, de is artis e de is mestieris e a connosci e tastai is guturrias de su setori agro-alimentari sardu.
In totu sa dii sa passillada at a èssiri alientada de acontéssius culturalis, amostas artísticas, esibitzionis de trumas musicalis traditzionalis, clàssicas e modernas. Is bisitadoris prus piticus ant a èssiri interessaus in momentus de spàssiu e recreu chi ddus ant a fai prexai.
Sa traditzioni, s’arti, sa música, sa cultura, su binu e sa cosa de papai bona, is coloris, is fragus e is saboris de su territóriu ant a arregalai una speriéntzia arrica e prena chi ĺsili si cumbidat a bivi e cumpratziri.