SARDU
Comunu de Carbònia: Sighit cun agradessimentu sa stagioni de prosa e de dantza organizada de su Cedac e de su "Circuito Multidisciplinare dello Spettacolo Sardegna", cun s'agiudu económicu de su Comunu de Carbònia. Apustis de su spetàculu "I am Hamlet" crasi, cenàbara 22 de Martzu, a is noioras mancu cuartu de a noti (20,45), in su Teatru Tzentrali andat in scena su de 7 atóbius de sa rassínnia curada de su Cedac, chi proponit su spetàculu "Else", de Nunzia Antonino e Carlo Bruni.
In s'interis, est giai tempus de fai unu primu bilantzu de sa stagioni teatrali de prosa e de dantza 2019:
" Seus satisfaus de sa programmatzioni proposta a is tzitadinus cosa nosta, chi s'est distinta po is resurtaus bonus meda siat po sa partitzipatzioni de púbricu siat po sa calidadi de is spetàculu chi fintzas a immui funt stétius rapresentaus" at nau sa Sindaghissa Paola Massidda.
Su spetàculu de crasi est pigau de s'òpera de Arthur Schnitzler, "La Signorina Else", tradúsia de Giuseppe Farese. Sa rapresentatzioni est una fotografia chentza de coru de sa sotziedadi de is Annus Binti de su Noixentus, innui una famíllia non nci pentzat duas bortas a sacrificai sa filla giovunedda po s' interessu económicu.