SARDU

Comunu de Biddacidru: Martis 27 e cenàbara 30 de Donniasantu 2018, h. 18,00-20,00 (de is ses de a merí fintzas a is otu) , in s’Auditorium Santa Barbara, in Pratza Santa Barbara in Biddacidru ddoi at duus atóbius po fueddai de Giovanni Spano. S’atóbiu de su 27 est intítulau “Giovanni Spano: Antropologo e linguista sardo”. Su de su 30 de Donniasantu s’intítulat  “Giovanni Spano Archeólogu sardu”. Su reladori po ambaduus is atóbius est Dot. Roberto Ibba de s’Universidadi de Casteddu. Is atóbius, organizaus de s’Universidadi de sa Tertza Edadi de Biddacidru e de su “Centro Culturali di Alta Formazione”, ddus finantziat sa Regioni Autònoma de Sardigna cunformas a sa L.R.  20 de Cabudanni 2006 n.14, art. 21 comma 1, lit.s. “ Propostas chi riguardant s’organizatzioni de manifestadas tzelebrativas de protagonistas  de sa stória e de sa cultura de sa Sardigna”.

***

Giovanni Spano nascit in Piaghe su 8 de Martzu  1803 e morit in Casteddu su 3 de Abrili 1878. At tentu medas incàrrigus: canónicu de su seu de Casteddu, professori de Scrituras Sacra e línguas orientalis in s’Universidadi de Casteddu e apustis retori de cuss’universidadi de su 1857, commissàriu po is antighidadis de s’Ísula e senatori de su Rénniu (de su 15 de Donniasantu 1871), membru de medas académias natzionalis e foresas.

Autori de medas òperas in campu literàriu e archeológicu, at tentu pruschetotu su méritu, acanta de Alberto La Marmora, de inghitzai unu stúdiu regulari e metódicu de is antighidadis de s’Ísula, e puru cussu prus mannu de fai in totu sa Sardigna scrucullus e scavus regularis, ponendi imparis  un’arragorta stravanada de antighidadis, chi apustis iat donau cun bonucoru a su museu de Casteddu e a su gabbbinetu archeológicu universitàriu de Tàtari. Custas duas atividadis de circadori e de illustradori, su Spanu ddas iat postas in luxi in is dexi annadas de su “Bollettino archeologico sardo” de su 1858 fintzas a su 1868, sighendi apustis cun nobas regularis in “Scoperte di antichità in Sardegna”de su 1871 fintzas a su 1876.

Su donu generosu si cumprendit mellus de su “Catalogo della raccolta archeologica sarda da lui donata al museo d’antichità di Cagliari” ( càstia parti 1^ Archeologia, Casteddu 1860; parti 2^ Numismatica, Casteddu 1865). Arragollidori, scavadori, intzulladori de stúdius, iat dépiu afrontai fadioris e perígulus; ma iat tenu sa satisfatzioni de presentai in su 1871 in su Cungressu preistóricu de Bologna un’arragorta de ogetus antigus de s’Ísula chi fiat stétia po totus is studiosus una novidadi stravanada. Issu fiat puru filólogu e folclorista e de custa atividadi cosa sua at lassau arregordu in “ Ortografia sarda nazionale o Grammatica del dialetto logudorese” (!840); in su “Vocabolario del dialetto logudorese” (1855) e a s’acabbu in su “Vocabolario sardo geografico patronimico” (Cagliari 1872).