SARDU
Comunu de Biddacidru: Fonti: L'Unione Sarda: Tzínema de primori po su períodu de Paschixedda in Biddacidru puru. Ddu proponit sa rassigna "Villacidro Film Festival" chi si fait su 21 - 23 - 26 - 28 - 30 de Meseidas in sa sala de stúdiu de sa Mediateca Comunali "F. De André".
Su programma previdit sa projetzioni de unus cantu de is mellus trabballus de su regista Woody Allen. In prus de prumovi sa passioni po su tzínema e sa partitzipatzioni a is atividadis culturalis, is organizadoris de sa rassigna, de su Tzírculu Literàriu "Joyce Lussu", si ponint intra de is tareas de sa proposta sa de donai motivus de arrexonamentu asuba de is argumentus de is pellículas projetadas, difatis unu momentu de diàlogu e cunfrontu cun su púbricu caraterizat dónnia apuntamentu tzinematogràficu. Non po úrtimu, s'acontéssiu bolit donai un'ambienti de cumpartzidura puru a chini in custu períodu, po medas motivus, est obrigau a abarrai a solu.
Calendàriu de is projetzionis: 21 de Meseidas "Basta che funtzioni", 23 de Meseidas "Mactch point", 26 de Meseidas "Zelig", 28 de Meseidas "Manhattan", 30 de Meseidas "Midnight in Paris".
Totus is apuntamentus funt a indonu e inghitzant a is ses de a merí (18.00).
Sa rassigna est cumprida cun s'agiudu de su Comunu de Biddacidru chi at aprovau su progetu chi cuncurriat in su bandu de gara "Dicembre con noi".