SARDU
Comunu de Biddacidru: Sighit in Biddacidru su programma musicali de "Mare e Miniere" cun su cuntzertu de música sacra "Boxis de Pasca Manna". "Mare e Miniere 2019" presentat Boxis de Pasca Manna: músicas originalis e arrangiamentus de Elena Ledda, Mauro Palmas, Marcello Peghin e Silvano Lobina. Martis 16 de Abrili de su 2019, seti de a merí (19,00), in sa Crésia de Santa Barbara, Biddacidru. Sa programmatzioni musicali de "Mare e Miniere 2019" sighit martis 16 de Abrili, a is seti de a merí (19,00) in sa crésia de Santa Barbara innui andat in scena su cuntzertu sacru "Boxis de Pasca Manna" chi bit protagonistas: Elena Ledda (boxi), Simonetta Soro (boxi), Mauro Palmas (liutu cantàbbili e mandolotzellu), Marcello Paghin (ghitarra), Silvano Lobina (bàsciu), Alessandro Foresti (órganu) e su "Cuncordu 'e Su Rosario" de Santu Lussurzu.
Frutu de una circa manna e longa asuba de is cantus de sa Cida Santa in Sardigna, sa rétzita ponit in luxi sa grandu spiritualidadi, sa capatzidadi comunicativa e sa funtzioni sotziali de custu repertóriu. Difatis in períodus pretzisus de s'annu ddus faint ancoras e ddus proponint a sa comunidadi cun sa matessi fortza espressiva chi teniant in s'antigóriu. Is boxis de Elena Ledda e Simonetta Soro ghiant a su púbricu po médiu de arrangiamentus nous de cantus costumaus, cumpositzionis originalis e cantus recuparaus de s'olvidu de su tempus torraus a ligi chentza de ndi mudai s'esséntzia. Is momentus de sa passioni e resurretzioni de Gesu Cristu funt descritus cun cantus de bellesa espressiva rara truessu su dolori de Maria. A fai totu prus pretziosu s'atóbiu cun unu de is corus masculinu prus interessantis e autenticus de cantus de sa costumàntzia sacra: "Su cuncordu ' e su Rosario" de Santu Lussurzu chi ponit imparis in armonia sa polivocalidadi masculina e femminina, donendi contu de sa tarea de sa rassínnia: sa fusioni de sa costumàntzia e de is tempus de oi. A cumpletai su cuntzertu nc'est una parti literària curada de Maria Gabriella Ledda chi afundat is arreíxinis cosa sua tanti in is rapresentatzionis sacras de orígini sardu-spanniolas cantu in creatzionis originalis intregadas a poetas fedalis.
Sa rassínnia
"Mare e Miniere 2019" ddu organizat Elenaleddavox cun s'agiudu de: "Fondazione Sardegna"; de sa Regioni Autònoma de Sardigna - Assessorau de s'Istrutzioni Púbrica, Benis Culturalis, Informatzioni, Spetàculu e Sport; de is Comunus interessaus; de Sardinia Ferries; de "Blogfoolk" e de su "Giornale della Musica". Sa Diretzioni artística est de Mauro Palmas.
Cuntatus
elenaleddavox Associazione Culturale
elenaleddavox@gmail.com
Giassu Ufitziali
www.mareeminiere.it
www.mareeminiere.com
Sighisí
www.facebook.com/mareminiereofficial/
https://twitter.com/mareeminiere