SARDU
Comunu de Gùspini:
Su 8 de Meseidas, h. 18.00 (ses de a merí) in su Tzineteatru Murgia, in bia Pio Piras, in Gùspini, sa cumpangia teatrali Sa Làntia de Rio Murtas portat in scena sa cumédia in Língua Sarda "Brullas de stanghera" a incuru de Giuliana Zurru cun sa regia de Guido Cadoni.
S'òpera fueddat de su stanghera chi in sa bidda cosa sua si spàssiat a contai contus chi inventat. A bortas cracat sa manu, difatis no est una brulla lèbia sa chi organizat a dannu de Remigio Garau.
A sa mulleri de Remigio ddi contant de sa morti de su pobiddu, acontéssia a sa bessida de su tzilleri. In aparéntzia Maria non ndi podit sanai de su dolori ma custu ddi passat luegus a sa bidea de incasciai s'asseguratzioni asuba de sa morti de su pobiddu.
A s'acabbu de su primu, sa furriada de su pobiddu imbriagu a domu fait pigai a sa cumédia unu percursu chi nisciunu si abetat.
Non ammancat s'organizatzioni de un'interru particulari cun un'àteru corpu de scena finali chi serrat sa cumédia.
Sa cumédia giai rapresentada in àters biddas at tentu unu grandu acunsentimentu de púbblicu.
Seis totus cumbidaus a partitzipai.