SARDU
Câdesédda: Festa de Su Pilau de su 11 e 12 de maju 2019. Sa de Cincu Editzionis
Po su Comunu de Câdesédda est arribbau su tempus de fai sciri is datas de sa "Festa de su Pilau". Sa de cincu editzionis de s'atóbiu dedicau a su pratu protagonista de sa coxina tabbarchina est sàbudu 11 e domínigu 12 de Maju 2019. S'Amministratzioni comunali ghiada de Antonio Vigo est giai trabballendi po apariciai su programma de sa grandu festa de beranu.
" Est voluntadi cosa nosta apariciai un'acontéssiu chi ponit imparis sa formula de sa manifestada enogastronómica cun unas cantu novidadis chi faint prus pretziosu un'atóbiu apretziau de tzitadinus e bisitadoris" narat Sergio Porseo, cunsilleri delegau a su Turismu e Pro Loco.
Duncas festa chi bincit non si càmbiat ma is bideas nobas ( de is stràngius a is atóbius a tema, chentza scarésci s'intratenimentu) non depint ammancai: " Custu acontéssiu, nàsciu atitzu 4 annus a oi, est crescendi, ddu testimóngiant i númunus" aciungit Porseo. Su 2018, at registrau in relatu a Câdesédda, una créscida in su flussu de is bisitadoris in su mesi de maju ( fonti Sired: + 37,74% de arribbus rispetu a su 2017) e sa Regioni at premiau sa "Festa de su Pilau" cumenti a "manifestada púbrica de grandu interessamentu turísticu" cun unu finantziamentu de 11.700,00 eurus.
In sa matessi línia , Cristiano Mercenaro, Assessori a s'Isport e a is Servítzius Tennológicus: " S'importu guadangiau a bellu a bellu de s'acontéssiu s'at permítiu de presentziai a manifestadas asuba de sa cosa de papai e de sa cultura in e a foras de s' Itàlia: apustis de Milano Expo e Madrid, de pagu seus stétius a sa "Giorronnada Stórica Pegliesa" in Ligúria, innui su PILAU at rapresentau su paisu cosa nosta in unu cuntestu internatzionali".
Sa frégula insaborida cun sa "grancèa", difatis, cumenti narat ancora una borta Mercenaro " est una pietàntza símbolu chi: reasumit in sei e totu una resorsa produtiva cosa nosta, est a nai sa pisca, e arremonat su mari cumenti a cordinada stórica ancoras a s'epopea de is tabbarchinus".
Abetendi is novidadis de s'editzioni chi benit, is amministradoris cunfirmant sa voluntadi de afortiai s'unioni cun is assótzius localis: "Po chi s'editzionis chi benit bessat beni, contaus in s'agiudu de is assótzius, de is sotziedadis sportivas, de is cummertziantis, e naturalmenti de is tzitadinus" acabbat Mercenaro.