SARDU
Comunu de Seddori: Apuntamentu su 9 de Austu in Seddori cun “Calici di Stelle”. In programma unu bríndisi de mesu istadi cun unu scioberu de binus de su nord a su sud de sa Sardigna in unu scenàriu de atrus tempus e un’acabbussu in is annus '80 cun Pino D'Angiò, icona pop e de sa disco italiana, chi de is 10 mancu cuartu (21,45) at fai baddai su púbblicu cun is notas de is sucessus suus, cumenti a su prus connotu “Ma quale idea”.
SU PROGRAMMA – Abertura a is 7 de a merii (19.00) intra is bias Sant'Anna e Nino Villa Santa cun is bancus de tastadura de binus nieddus, biancu e arrosaus, binus de meditatzioni e spumantis de 21 cantinas chi ndi benint de territórius diferentis de Sardigna. De is 5 de a merii (17.00) abbísitas ghiadas in su Casteddu e agoa intra is stradixeddas s’ant a esibbiri is trampuleris e giogulanus de su Circu Mano a Mano. De is 7 e mesu de a merii (9:30) in pratza Castello su protagonista est sa cosa de papai passillendi a incuru de "Eat's Calici di Stelle" cun is propostas de I Cherchi, La Mallicca, Old Square, Is Paulis, Coxinendi, ofelleria Eden, gelateria I Fenu, Porta 1918. In is giardinus de su Casteddu a is 8 de a merii (20.00) s’enólogu spertu de s'Agris Gianni Lovicu e su giornalista Roberto Ripa ant a ghiai su púbblicu in unu "Biaxi in su mundu de is bingialis sardus autóctonus ".
«Unu patrimóniu inestimàbbili chi si depit avalorai ancora in s’arrichesa de is biodiversidadis suas», spiegat Gianni Lovicu. «Seus lómpius a sa de 5 editzionis regionalis de “Calici di Stelle”, po mei ca est sa prima cumenti a presidenti de su Movimentu, fiat unu bisu a dda portai a Seddori in unu logu eciseri e arricu de stória che a su Casteddu Medievali. Est un’editzioni de importu siat po su númeru de cantinas chi partétzipat e siat po s’arrichesa gastronómica chi dda marcat, giai ca su lióngiu intra binu e cosa de papai est sa mellus manera po fai a cumprendi su chi si fait in cantina», at nau Valeria Pilloni. A su nai de Alberto Urpi síndigu de Seddori, «a promovi sa cultura enogastronómica est una cosa primorosa, po cussu eus donau totu s’agiudu po chi s’acontéssiu de su 2023 potzat diventai s’editzioni mellus».
Sa manifestatzioni regionali dd’aparíciat "Cantinas de su Movimentu de su turismu de su binu de Sardigna" chi ddu ghiat Valeria Pilloni, presidenti de sa cantina Su 'entu de Seddori paris cun su Comunu de Seddori.