SARDU
Comunu de Carbònia: Apustis de s’acunsentimentu mannu de sa primu editzioni, cenàbara 17 de Gennaxu 2020 a is ses mancu cuartu de a merí (17.45), in Barbusi, in sa pratzita ananti de crésia, si fait su de duus fogadonis de Sant’Antoni Abati, un’acontéssiu organizau de su Comitau de Sant’Antoni imparis cun sa parróchia de sa “Beata Vergine delle Grazie” e cun s’agiudu de su Comunu de Carbònia.
“S’acontéssiu est unu momentu importanti de unioni e cumpartzidura po totu sa comunidadi de Barbusi chi, in arregordu de Sant’Antoni Abati, protetori de is animalis masedus, alluit unu fogadoni acumpangiau de música, baddus e folclori” at spricau sa Sindaghissa Paola Massidda.
In sa mitologia sarda, Sant’Antoni Abati nd’iat furau su fogu a is tiàulus cun unu bastoni de feurra, apustis de essi brintau a s’inferru po ndi torrai a pigai su proceddeddu cosa sua.
“Sa de 2 editzionis de su Fogadoni de Sant’Antoni rapresentat un’ocasioni po arremonai is costumàntzias de sa cultura sarda, chi afundant is arreíxinis in su mundu protosardu cumenti a testimóngiu de unu patrimóniu immateriali chi interessat s’antropologia, sa sotzialidadi e sa stória de unu territóriu chi contat po médiu de is símbolus cosa sua, apoderaus fintzas a oi, unu contu umanu eciseri, chi podit rapresentai cun arrexoni Carbònia cumenti a Capitali Italiana de sa Cultura 2021”, at nau s’Assessora a sa Cultura Sabina Saiu.
Su programma de s’acontéssiu previdit a is ses mancu cuartu de a merí (17.45) sa beneditzioni e s’alluidura de su fogadoni e, a sighiri, su stentu in cumpangia de su grupu folclorísticu “Is Massaius” de Barbusi.