SARDU

Comunu de Carbònia: Si torrat a annoai ocannu puru s'atóbiu cun "Il Villaggio di Babbo Natale". Su primu atóbiu est domínigu 8 de Meseidas in su Parcu Archiológicu de "Cannas di Sotto". "Un'acontéssiu de non pérdiri po tantis pipius chi benint non scéti de Crabònia e de su territóriu cosa nosta ma de is àteras zonas de su Sud Sardigna, a cunfirma de sa grandu capatzidadi atrativa de su "Villaggio di Babbo Natale", in gradu de atirai in is tres editzionis passadas unus cantu milla bisitadoris", at nau sa Sindaghissa Paola Massidda.

Sa proposta est movia de s'assótziu culturali "Sturmtruppen" imparis cun sa Pro Locu e cun s'agiudu de su Comunu de Carbònia.

Po s'ocasioni est stétiu apariciau unu furriadroxu chi riservat  medas sorpresas e novidadis po is prus piticus, ghiaus de is elfus in is domixeddas e in is aposentus, fintzas a atobiai Babbu Natali cun is arregallus cosa sua.

Su "Villaggio di Babbo Natale" aberrit segundu su calendàriu e s'oràriu chi sighit:

Meseidas: 8, 15 e 22

A mengianu  9.30 -12.30, de is noioras de a mengianu fintzas a mesudí;

A merí 15.30 -18.30, de is tres e mesu fintzas a is ses e mesu de a merí.