SARDU
Comunu de Carbònia: Su Comunu de Carbònia fait sciri a sa tzitadinàntzia chi sàbudu 16 de Martzu, a is dexi de a mengianu (10,00), in s'àula anfiteatru de s'Istitutu "G.M.Angioy" inghitzat su tziclu nou de atóbius intitulau "Carbonia Incontra". "S'Amministratzioni Comunali est sa promotora de unus cantu atóbius chi funt un'ocasioni de connoscéntzia e cunfrontu intra de studiantis, de insenniantis, de dirigentis scolàsticus, de assótzius, de tzitadinus e de figuras istitutzionalis chi si funt distintas in cuntestus culturalis e scientíficus", at nau sa Sindaghissa Paola Massidda.
Su primu stràngiu de "Carbonia Incontra" est Alessandro Biggio, artista intra de is prus interessantis e produtivus de sa generatzioni cosa sua. Nàsciu in Casteddu in su 1974, bivit e trabballat in Casteddu e in Câdesédda. Is trabballus cosa sua si diferentziant po sa sperimentadura de unu materiali particulari meda, su cinisu. In su camminu professionali de s'artista torrat fatuvatu sa tenta de interpretai s'insularidadi non cumenti a sinónimu de isulamentu, ma antzis de oportunidadi.
Su programma de s'acontéssiu "Carbonia Incontra" previdit is interventus chi sighint:
10,00 (dexi de a mengianu): saludus de sa Sindaghissa Paola Massidda e presentada de s'artista de parti de s'Assessora a sa Cultura, Sabrina Sabiu;
10,15 - 12,00 (de is dexi e cuartu fintzas a mesudí): relata de s'artista Alessandro Biggio pretzida in is partis chi sighint:
- camminu artísticu po médiu de su contu de is òperas prus sinnificativas;
- "focus" asuba de is progetus "púbricus" acapiaus a su territóriu e a sa sotzialidadi;
- diàlogu abertu cun totus is partitzipantis a s'atóbiu.
12,00 (mesudí): serrada de is trabballus a incuru de s'Assessori a s'Istrutzioni Púbrica, Valerio Piria.