SARDU
Comunu de Carbònia: Cunferéntzia po is giornalis in "streaming" disponíbbili in sa pàgina Facebook de "Carbonia Film Festival":
In s'eX MA de Casteddu ant presentau sa de dexi editzionis de su Carbònia Film Festival chi incumentzat martis 6 e acabat dòmingu 11 de mesi de ladàmini, chi ocannu tenit in totu 16 filmis in cuncursu (8 po sa setzioni de is metràgius longus e 8 po sa setzioni de is metràgius curtzus).
Paolo Serra, chi est su diretori de su Centro Servizi de sa Società Umanitaria de Carbònia, at nau chi s'editzioni de ocannu est cunditzionada meda de s'apretu de su covid e craramenti non si podint fai totus is atividadis de is editzionis passadas. Po non perdi su traballu fatu in antis de su lockdown est beniu a marolla a si adatai a su tempus chi seus bivendi: is proietzionis si faint a in donu in su Cineteatro Centrale de pratza Roma ma su nùmeru de postus est ridùsiu a 150 (tocat a prenotai) e in prus gràtzias a sa piataforma on line si podit proponni su festival fintzas a su pùbblicu de "continenti".
Pustis est intervènnia s'assessora a sa cultura de Carbònia Sabrina Sabiu chi at decrarau ca custa manifestatzioni est espressioni de su patrimòniu culturali de una tzitadi, chi est giòvuna meda e est nàscia cun sa miniera. De pagu Carbònia, candidada a essi capitali de sa cultura 2022, est stètia malatratada de unu giorronali natzionali po chistionis de estètica, ma si de bellesa si podit arrexonai – sendi chi est una chistioni sogetiva e non si podit mesurai in manera pretzisa – est siguru chi custa eventu tenit valori culturali mannu meda est po custu est unu de is puntus de fortza de sa candidadura de Carbònia.
Su diretori artìsticu Francesco Giai Via at spiegau ca ca mancai su 2020 siat un'annu de pagu siguresas e de scenàrius mai connotus, difìtzili meda po su mundu de spetàculu in generali, is setzionis cumpetitivas ant a portai in prima assoluta in Itàlia sa mellus produtzioni de su cìnema de autori internatzionali de s'ùrtimu annu in contu de is temàticas de su traballu e de is migratzionis: unu viàgiu chi passat in Amèrica, in Àfrica, in Àsia e in medas paisus europeus.
Gràtzias a sa piaaforma streaming si podit mostrai sa seletzioni foras de s'Ìsula permitendi a su pùbblicu italianu de apretziai su traballu de programmatzioni chi de sèmpiri circat non sceti cualidadi cinematogràfica ma fintzas sa cualidadi polìtica e umana.
Infatis totus is filmis, in pari a is arrexonadas cun is autoris de is metràgius longus, ant a essi a dispositzioni on line: po ddus castiai bastat a si registrai in online.carboniafilmfest.org (su nùmeru màssimu est de 1000 spetadoris virtualis), invècias de custu link si podit castiai su calendàriu de is films in programma.
Su Carbonia Film Festival sighit cun sa vocatzioni formativa sua: infatis totus is spetadoris de 20 a 30 annus fiant cumbidaus a si iscriri a sa Giuria Carbonia Cinema Giovani chi at a assegnai on line su prèmiu a su mellus metràgiu curtzu internatzionali. Nc'at a essi po issus unu programma de formatzioni dedicau cun webinar e masterclass.
Su Carbònia Film Festival est organizau de su Centro Servizi Culturali Carboniade sa Società Umanitaria - Fabbrica del Cinema e Cineteca Sarda cun sa diretzioni artìstica de Fransco Giai Via, in pari a sa Regioni Autònoma de Sardigna, cun su patrotzìniu de su Comunu de Carbònia a su sustegnu de su Mibact e de sa Fondazione Sardegna Film Commission.