SARDU
Comunu de Carbònia: Su Museu de su Craboni e su SIMUC (Sistema Museali de Carbònia), cun su patrotzìniu de s'Amministratzioni Comunali de Carbònia partetzipant a is "Diis europeas de su patrimòniu" programmadas po su 26 e su 27 de cabudanni, chi ocannu tenint po tema "Learning for Life- Imparai po sa vida". In su Museu de su Craboni a is 4:30 de merì su designer Stefano Asili at a ponni sa firma sua in sa "Sindone de Serbariu", un'òpera permanenti chi at ammanniu in sa sala de is dòcias de sa Lampisteria aundi is ex minadoris de sa Grande Miniera chi ancora si agant ant lassau sa firma insoru in pari a sa cualìfica chi teniant a intrus de sa miniera. A is 6 invècias s'at a incingiai s' ammostu “Minatori e Miniere tra lampade e sottosuolo – B'at zente asut'e terra cada die traballande”. Is bisitadoris ant a podi castiai una colletzioni de francubullus, bustas e cartolinas (prus de 200 petzus) chi tenint a tema su traballu in miniera.
S'ammostu, a in curu de Graziano Lèbiu, spiegat beni a comenti sa miniera fiat unu logu de agregatzioni ùnicu chi podiat marcai in manera funguda siat sa personalidadi de su minadori, sa famìlia sua e fintzas totu sa sotziedadi. Sa colletzioni etotu est una testimònia de su traballu e de sa vida asuta de terra cun sa cumpangia de sa làntia.
Po toteduas is diis est prevista sa bìsita ghiada de sa galleria e de sa sala àrganus paghendi su billetu ridùsiu (is bìsitas incumentzat a is 10:15 – 11:30 – 12:45 – 15:00 – 16:45, prenotatzioni obbligatòria telefonendi a su 078162727); est a in donu sa bìsita a sa mustra filatèlica.
Invècias in su Parcu Urbanu de Cannas de Bàsciu, domingu 27, a totu dii, is ghias de sa coop. Sistema Museo chi gestit su SIMUC apariciant s'eventu "Janas in Città": de chi spiegant s'impreu de is tumbas preistòricas de sa necròpoli ant a contai a comenti si funt "trasformadas" in "domus de janas".
S'Intrada (in bia Fertilia) est a in donu po totus, is bìsitas s'ant a fai a is: 10:15; 11:15; 12:15; 15:15;16:15;17:15 ma bisongiat a prenotai telefonendi a su 0781.1867304 / 345.8886058 o mandendi una mail a carbonia@sistemamuseo.it
In su rispetu de is normativas anticovid in totus is situs tocat a:
- Si igenizai is manus in antis de intrai incumentzai sa bìsita;
- abarrai postus de mascareddas e a abarrai stesiaus assumancus unu metru int'e personas chi apartenit a nùcleus familiaris diferentis.