SARDU
Comunu de Carbònia: Abetendi sa stasoni noba de prosa e dantza 2020, sighint is spetàculus de primori postus in scena in su Teatru Tzentrali de Pratza Roma in Carbònia. Sàbudu 30 de Donniasantu, a is noioras mancu cuartu de a noti (20.45), Michela Sale e Tiziana Troja, prus connotas cumenti a "Le Lucide" de sa Cumpangia "Lucido Sottile", funt protagonistas de sa cummédia scundida "La Conosci Giulia?".
S'acontéssiu organizau de su CEDAC (Centro Diffusione Attività Culturali) cun s'agiudu de su Comunu de Carbònia, si insertat in su cuntestu de su programma de atividadis 2018 - 2019 de su Corecom (Organismu de sa Regioni Sardigna po is comunicatzionis), chi punnat a prumovi, imparis cun Giulia Sardegna - assótziu chi tenit cumenti a cordinadora sa giornalista Susi Ronchi - , sa paridadi de generi e a cuntrastai sa cultura de is divisionis, de is diseguàlliantzias, chi si tradusint fatuvatu in formas de violéntzia. Argumentu cantu mai de is tempus de oi, pruschetotu a sa luxi de sa festa, partitzipada, de su 25 de Donniasantu cumenti a "Giornada Internatzionali po sa sperdidura de sa violéntzia contras a is Fémminas".
Seus segurus chi is cuntzitadinus cosa nosta agradessint su spetàculu de sàbudu siat po sa calidadi de is atoris e de is atoras siat, pruschetotu, po sa capatzidadi de afrontai un'argumentu tostu cumenti a sa discriminatzioni de is fémminas in su trabballu e is dificultadis cosa insoru a essi rapresentadas bastanti a is vérticis de is giornalis de informatzioni de prus importu siat natzionalis chi regionalis. Postus de trabballu ancora medas bortas riservaus a is óminis" at nau sa Sindaghissa Paola Massidda.
Sa rapresentatzioni po médiu de rítimus biatzus e lestrus de sa cummédia bit in scena cuindixi artistas chi alternant scenetas spassiosas a momentus drammàticus, po donai elementus de arrexonu e agiudai a formai cussa cusciéntzia colletiva indispensàbbili po conchistai su deretu democràticu de sa paridadi infra de is generis. In su spàtziu scénicu si podit apretziai sa fintzioni giornalística de una redatzioni giornalística dirígia in manera stravanada de una fémmina, chi si preparat a fai unu "scoop" contras a is discriminatzionis de géneri.