SARDU
Comunu de Gùspini: Unu cuncursu fotogràficu e un’ammosta po aguantai biu su spíritu de su Carnovali. Si sperat puru chi cumparessant is “Cambas de Linna”.
Ocannu puru Gúspini, po nexi de sa pandemia de Covid-19, depit fai de mancu de sa sfilada traditzionali in màscara de su Carnovali Guspinesu “Cambas de Linna”, chi de 30 annus ponit impari sa traditzioni de sa màscara stórica única de is "Cambas de linna" cun cussa de is maistus de sa cartapista, e de tempus meda est unu de is apuntamentus prus abetaus de sa Comunidadi e unu riferimentu po milli e prus figurantis chi ndi lompint de dónnia parti de Sardigna.
Gúspini a dónnia manera no bolit fai de mancu de afestai su Carnovali assumancu cun is modalidadis diferentis chi custa emergèntzia si permitit de fai.
Ducas si torrat a proponni su cuncursu fotogràficu cumentzau in su 2021 e cunfirmau po su 2022 puru chi prémiat sa màscara prus bella de su Carnovali Guspinesu. Sa tenta de su cuncursu est de partecipai a manera fantasiosa a su giogu e de donai, cun d-unu símbulu, sighidura a su Carnovali guspinesu "Cambas de Linna" in tempus de pandemia puru, innui funt suspéndias is sfiladas de is carrus allegóricus e de is trumas mascaradas.
Cumenti si partécipat?
Su Cuncursu pertocat a sa realizatzioni de unu mascheramentu in calisisiat técnica. Su tema est líberu e, a segunda de sa fantasia de su partecipanti, sa màscara scerada podit tenni unu significau allegóricu, brullanu o strocidori ma no depit mai ofendi atra genti o arresurtai sbregungia.
Sa màscara prus bella depit èssiri originali, brullana, fantasiosa;
Po partecipai no si pagat nudda.
Is partecipantis, pustis chi ant fatu su mascheramentu insoru e pustis de ai tirau una forografia depint:
- Ponni sa fotografia cumenti a unu post in s’acontéssiu Contest fotografico “La miglior Maschera del Carnevale guspinese 2022", creau in sa pàgina Facebook de su Comunu de Gúspini;
- Cumpriri sa fotografia cun d-una didascalia innui si ponit su tema, sa técnica e is materialis imperaus;
- Imperai is ashtag #migliormaschera e #carnevaleguspini2022
- Su post si depit carrigai in Facebook aintru de is 14.00 de domínigu 6 de Martzu 2022, pustis de custa data no est prus possíbbili a carrigai nudda chi pertocat a cust’acontéssiu.
Fintzas a is 10.00 de lunis 14 de Martzu 2022 is umperadoris podint ponni una reatzioni (Mi praxit, Coru, Impràssidu) a is màginis chi pentzant de si ddu meresci. Agoa s’at a privatizai s’acontéssiu fintzas a candu spàciant is operatzionis de conta chi ant a donai una prima classífica intra is partecipantis.
Dónnia partecipanti podit carrigai unu post sceti chi pertocat a su Cuncursu, e duncas podit partecipai cun d-una màscara sceti. Chi si càrrigant prus post, custus ant a abarrai foras.
Po sciri atras minudas tocat a ligi su bandu cumpletu.
Impari a su cuncursu fotogràficu sa Proloco paris cu is assótzius e is trumas prus fichias in is atividadis de su carnovali, fait un’ammosta chi torrat a percurri sa stória de su carnovali in Gúspini e chi est ordingiada in bia San Nicolò 13 (ex sedi de su GAL). Est oberta a su púbblicu de su 24 de Friàrgiu a su 6 de Martzu de is 6 a is 8 de a merii.
Si sperat puru chi intra su 24 de Friàrgiu e su 6 de Martzu si fetzant a biri calincuna borta peri bias de sa bidda fintzas is Cambas de Linna.