Carta Carbònia est su fèstival literàriu carboniesu chi afirmat s’aficu culturali de sa citadi cun sa de duas editzionis de sa ressigna. Dae su 24 finas a su 27 de mes’e Argiolas in s’Arena Mirastelle su pùbblicu at a pòdiri atobiai caras nodias de sa literadura italiana e sarda. In sa lista de “is mannus” chi ant a arrexonai de is òperas insoru o chi ant a donai prova de teatru e de mùsica aparant is nòminis de Stefano Mancuso, Giovanni Storti, Andrea Scanzi, Barbara Serra, Gad Lerner, Mariangela Pira, Marco Varvello e Massimo Cerofolini.
A rapresentai sa lìngua isolana nc’at grandu abetu po “GHERRAS” su libru nou de Giuseppe Coròngiu, una regorta de contus chi marcat su passu, cun de tres òperas literària, in s’àndala artìstica de s’iscritori laconesu.
Su libru torrat a sa primu òpera, Metropòlitània, cun una filera de contos chi pintant iscenàrius distòpicus de unu benidori a bortas a curtzu, a borta a illargu dae su presenti nostru disdiciosamenti marcau de is acontèssidas de gherra chi trumentant su mundu.
“Un’òpera unitària cumposta de contus curtzus e longus chi iscrucùlliat, cun sa narratzioni, is medas caras de is cuntierras.
Dae is gherras tristas e connotas de su mundu, finas a is brigas de su fitianu nostru cun unu filu arrùbiu de violèntzia chi tressat sa sociedadi, is famìlias, is personis etotu.
Coròngiu contat de invasoris, isfortzaduras, de ocidroxus, de mundus distòpicus e cuntemporàneus trumentaus dae sa tirannia e dae is armas.
Ma fintzas de sa sociedadi a dii de oi, ispaciada dae s’iscuncòrdia e dae s’individualismu brigantinu foras de sentidu e foras de ispera. Coment’e in sa chistioni linguìstica. Su murale, a tintas ispriadas, de un’Ìsula-Mundu, pintau in sardu, fait logu perou a s’illoidura de s’ànima.
Onniunu si nd’iscabullit a manera sua, a comenti podit: iscidendi·si dae bisus malus, furriendi a befa is farsas cuntoerras, iscapendi presoneris, aciapendi reus o contendi a istrocidura sa derrota de totu una generatzioni.”
Totus is eventus funt lìberus e a gratis
Po info e nouas:
Carta Carbonia su Facebook