SARDU

Comunu de Carbònia: Su Comunu de Carbònia acunsentit a sa proposta "M'illumino di meno" sa giornada de su rispàrmiu energéticu e de is stilis de vida susteníbbilis, chi si fait crasi cenàbara 1° de Martzu.

S'acontéssiu dd'at ideau in su 2005 sa trasmissioni radiofónica "Caterpillar" e "Rai Radio2" po pregontai a is ascoltadoris cosa insoru de studai totus is luxis chi non serbint.

"Sa proposta punnat a sensibbilizai tzitadinu, aziendas e istitutzionis asuba de s'argumentu de su rispàrmiu energéticu, chi si cuncretizat non scéti in interventus struturalis ma in acorgimentus piticus chi donniunu de nosu podit ponni in pràtiga cun sa tarea de smenguai is sprecus. Duncas cumbidu a is tzitadinus cosa nosta a pigai parti in manera simbólica a sa proposta, studendi, crasi, una lampadina o is luxi aforas de domu insoru" at nau sa Sindaghissa, Paola Massidda.

Cumenti at pretzisau s'Assessori a s'Ambienti, Gianluca Lai: "Sa proposta est dedicada a s'economia tzirculari: de su torrai a umperai is materialis a sa smenguadura de is sprecus. Su Comunu de Carbònia pigat parti a custa giornada de sensibbilizatzioni studendi is luxis de unus cantu monumentus de importu chi ndi caraterizant su patrimóniu: sa Turri Litória e sa Crésia de sa Beata Vírgini Addolorada. "M'illumino di meno" est de unu totu in línia  cun s'acunsentimentu de su Comunu de Carbònia - acuntéssiu cun delíbbera n.69 de su Consillu Comunali de su 21 de Meseladàmini 2016- a s'Acórdiu de is Síndigus e a su Pianu de Atzioni po s'energia susteníbbili e su Clima (PAESC), chi punnant a smenguai sa bogadura de CO₂ in su territóriu de su comunu cosa nosta de assumancu su 40% aintru de su 2030.

S'acontéssiu de crasi si insertat de unu totu in su cuntestu de is interventus importantis de cualificatzioni energética noba chi funt interessendi is impiantus de illuminatzioni púbrica, cumportendi una smenguadura importanti de is consumus e de s'incuinamentu luminosu in sa tzitadi cosa nosta".