SARDU
Comunu de Casteddu : Fonti: "La Gazzetta del Medio Campidano": Po custu acabbu de cida ddoi funt in programma in su Teatru de Casteddu unus cantu de cuncertus e spetàculus teatralis po acuntentai a totus is spetadoris. In su Teatru Lìricu cenàbara su 3 de martzu a is otu e mesu e sàbudu 4 a is seti de a merì ddoi at a essi su de cincu atòbiu de sa Stagioni cuncertìstica 2023 cun su cuncertu de s’Orchestra de su Teatru Lìricu, cun sa diretora Valentina Peleggi. Su programma previdit is branus musicalis chi sighint: Il flauto magico K. 620: Ouverture di Wolfgang Amadeus Mozart; Seconda Sinfonia in Re maggiore di Muzio Clementi; Settima Sinfonia in La maggiore op. 92 di Ludwig van Beethoven. Sàbudu su 4 de martzu a is noi oras de noti in su palcu de su Teatru Doglio ddoi at a essi su spetàculu de sa cantanti Francesca Michielin, cun su tour “Bonsoir! – Michielin10 in teatru e ùnigu atòbiu in Sardigna” po contu de Vivo Concerti, billetus giai spaciaus. Su spetàculu s’at a fai connosci is branus de s’ùrtimu album cosa sua Cani Sciolti, bessiu su 24 de friaxu po sa Columbia Records/Sony Music Italy. Sa cantanti e scritora at a ammentai is dexi annus suus de carriera, cantendi cantzonis noas e bècias chi dd’ant permìtiu de diventai famada in custus annus. In su Teatru del Segno sempri cenàbara su 3 e sàbudu su 4 de martzu ddoi ant a essi is atòbius de “Teatro senza Quartiere marzo – maggio 2023”. Si inghitzat cun su spetàculu “Senza Fiato, Una risata vi seppellirà a me la fibrosi cistica forse”, produtzioni Teatru del Segno, scritu de Pierpaolo Baingiu cun regia de Stefano Ledda. Protagonistas Pierpaolo Baingiu, Luciano Sezzi (sassofunu) e Stefano Ledda (boxi), Senza Fiato” contat cun spàssiu sa stòria de una vida particolari, in cumpangia de una mobadia rara genetica ereditària (sa Fibrosi Cistica) chi cunditzionat sa vida de una persona finas de s’infàntzia. Po atras informatzionis, costus e disponibilidadi de is billetus podeis castiai in su situ internet de is organizadoris.