SARDU
Comunu de Gùspini: Su 22 de abrili a is 4 e mesu de a merii (16,30) in sa sala de su Gal Pratza Mercato in Gúspini, si chistionat de sa necessidadi de connosci a marolla totus is normas (legislatzioni, atzessu a su créditu, pianu de impresa) innantis de cumentzai un’atividadi in própiu. S'atóbiu cun su títulu "Conoscere per intraprendere" est stichiu in su tzíclu de seminàrius apariciaus de sa Commissioni Paris Oportunidadis de su Comunu de Gúspini, po sensibilizai a sa Cultura de impresa e a su svilupu sótziu-económicu de su territóriu locali.
Sa comissioni at a circai de donai prus atentzioni a su mundu de is féminas, cun sa tarea de avalorai s’arrolu de sa fémina in su mundu imprenditoriali.
Sa comissioni, difati est cumbinta chi s’acostamentu pragmàticu de sa fémina arrennèsciat a portai unu contribbudu de importu a s’economia de su territóriu e de sa tzitadina nosta, e ca est necessàriu a premiai custa energia agiudendi su prus possíbbili una preséntzia prus manna de is féminas in su mundu de su trabballu.
In custu tema si còllocat su seminàriu “Conoscere per Intraprendere” chi at a biri sa preséntzia de reladoras preparadas e cun esperiéntzia manna in su setori.
- Maria Cristina Manca – Responsàbbili de pianificatzioni e cuntrollu diretzionali de sa Cooperativa LatteArborea at a chistionai de su tema: “Essere Imprenditori: di sé stessi, di un’azienda, del futuro”
- Orsola Altea -Manager Interprise Solution – at chistionai apitzus de su tema: “Conoscere per intraprendere”
Sighint is testimóngius de duas imprendidoras guspinesas giòvonas:
- Silvia Pani – Sienda Shisha
- Adelaide Carta – Sienda AC
Trabballai in própiu, po féminas meda, no est sceti unu modu po s’afirmai personalmenti e professionalmenti, ma est pruschetotu unu fatori fundamentali po fai cresci e svilupai totu su territóriu. Sa Commissioni pari oportunidadis si ponit duncas sa tarea de avalorai su contribbudu chi s’universu feminili podit donai a s’economia de sa tzitadina de Gúspini circhendi de ndi insutzuligai sa partecipatzioni in is téssius produtivus.