SARDU

Comunu de Biddanoa de Forru: In Biddanoa de Forru seus organizendi sa nàscida de una comunidadi energètica. Bieus ita est. Sa comunidadi energètica est unu assòtziu de personas chi consumant s’energia elètrica produsia de issas e totu. Sa comunidadi energètica tenit su puntu tzentrali in d-una cabina elètrica pretzisa, acapiada a unu impiantu fotovoltaicu. Is chi faint parti de sa comunidadi energètica pigant s’energia de custu impiantu fotovoltaicu chi dònat energia a totu sa comunidadi. Is membrus de sa comunidadi energètica no depint installai in domu insoru nisciunu pannellu fotovoltaicu, nisciunu inverter e mancu un’atru impiantu, ma sceti una scatuledda pitica ca sinnat sa mesura de is consumus de donniunu. No depint nimancu mudai frunidori. Sa comunidadi energètica tenit spesas e intradas. Sa volontadi de su Comunu de Biddanoa de Forru est cussa de si fai càrrigu de is spesas de sa costruidura e de sa manutentzioni de s’impiantu. No ddoi funt atras spesas. Dònnia membru de sa comunidadi energètica at a sighiri a pagai is bulletas suas, ma at a incassai puru is intradas de sa comunidadi: circa 120-130 èurus po dònnia megawatora de energia produsia dònnia annu, a de die. Po cumprendi cantu siat cumbenienti fadeisidda ddus contus castiendi sa bulleta elètrica chi pagais. Custu in generali. Su Comunu de Biddanoa de Forru bolit spratzinai sa comunidadi energètica a totu sa bidda. Po arraxonis tècnicas e burocràticas eus detzidiu perou de inghitzai de sa cabina elètrica chi s’agatat innantis de s’ex Ial: de custa cabina difatis ndi pigant s’energia prus o mancu 160 impitadoris, est a nai sa majoria de sa bidda. S’obietivu primàriu nostu est cussu de averiguai s’interessi de sa comunidadi: est a nai cumprendi cantu personas bolint pigai parti a custu progetu de comunidadi energètica.

Po custu ndi eus a chistionai totu sa dì cenàbara su 29 de gennaxu. Ddoi ant a essi is tècnicus de sa cooperativa ènostra, chi s’agiudant in custa esperièntzia. Po crupa de sa pandèmia, no podeus organizai un’assemblea pùbblica. Duncas eus a arriciri is tzitadinus nostus me is àulas de sa scola mèdia in Bia Argiolas, a turnu e sighendi totus is normas de siguresa, de is noi oras de a mengianu a sa una (9-13) e de is tres a pustis pràngiu a is ses de a merì (15-18), po acrarai totus is dudas.

S’invitu pertocat, po primus, totus is residentis me is bias interessadas de su progetu:

Bia Tuveri, Bia Sanluri, Loc. Roia Porcu, Viali Delle Tamerici, Loc. Musius, Bia Delle Grotte, Utureddu Bia Delle Grotte, Loc. Perdas Mindas, Bia Bonaria, Utureddu Bonaria, Bia Argiolas, Bia Vittorio Emanuele, Utureddu I Vittorio Emanuele, Utureddu II Vittorio Emanuele, Utureddu III Vittorio Emanuele, Bia Regina Elena, Utureddu I Regina Elena, Utureddu II Regina Elena, Utureddu III Regina Elena, Bia San Sebastiano, Loc. Cu Pesau, Bia Circonvallazione, Viali dei Carrubi, Utureddu Bia Dei Carrubi.

Is chi bivint in custas arrugas funt invitaus a andai in sa scola mèdia intro de is oràrius inditaus, cenàbara su 29 de gennaxu. Pentzaus ca sa creatzioni de una comunidadi energètica siat de importu mannu meda po sa bidda, siat po su chi pertocat s’econòmia siat po s’ambienti.

S’abetaus.

Si torru gràtzias

Su Sìndigu, Maurizio Onnis