SARDU
Sa Provìncia de su Campidanu de Mesu fait sciri ca in su Comunu de Sàrdara, a partiri de su 15 de ladàmini 2026, torrat a aberri su Sportellu de Lìngua Sarda. S’operadori, Larentu Argiolas, at a essi a disponimentu dònnia giòbia de is 8:30 a is 14:30. Su pùbblicu s’arriciit de is 11:00 a 12:00. Dd’eis agatai in sa Ludoteca in Bia Vittorio Emanuele III.
Su Sportellu de Lìngua Sarda tenit sa punna de agiudai a totu is tzitadinus a fai furriaduras in lìngua sarda, imparendiddi a ligi e a scriri. Cun sa scola, is entis de su territòriu, sa parròchia, is assòtzius, is atividadis cummercialis o atividadis turìsticas s’ant a podi cuncordai collabboratzionis e consulèntzias po apariciai materiali informativu e didàticu in contu de sa lìngua e sa cultura sarda.
A su Sportellu de Lìngua Sarda de Sàrdara, coment’e sportellu de su territòriu, ant a fai arreferimentu fintzas is Comunus de Biddanoa ‘e Forru, Forru, Pauli Arbarei, Siddi e Ussaramanna.
A s’operadori ddu podeis cuntatai a su nùmeru de telefunu 3463327593 o a s’indiritzu mail larentu.argiolas@gmail.com;
Su servìtziu est a indonu po totus, finantziau cun su dinai de sa Provìncia de su Campidanu de Mesu cun su contributu Tulis annualidadi 2025-2026-2028 de sa Regione Autònoma de Sardigna, cunforma a sa Lei 482/1999 e a sa L.R. 22/2018.