SARDU

Comunu de Gùspini: “Est unu grandu miràculu chi deu no apa lassau a perdi totus is speras cosa mia ca custas parrint chi non siant ne in celu ne in terra e chi non si podint fai. Ddas téngiu ancoras, mancai totu is acontéssius, ca sigu a crei chi s'Ómini siat bonu”.

Cun custus fueddus su Comunu de Gùspini arremonat s'Olocàustu in sa Dí de sa Memória. Funt is fueddus de Anna Frank, una de is boxis prus fortis de sa Memória de sa Shoah, de s'orrori de su nazifascimu e de sa presonia in is campus de cuntzentramentu innui est morta intra de friaxu e martzu de su 1945. Che unu faru e una ghia po non sutapretziai su poderi de s'òdiu e sa “fiolera de su mali”, su diàriu cosa sua est bessiu unu símbolu de unu de is períodus prus légius de sa stória.

Su 27 de Gennaxu est una data de grandu importu de allogai in sa memória colletiva: est diaici de 75 annu po s'importu chi tenit e po su chi rapresentat. No est unu casu chi sa Dí de sa Memória siat s'única festa tzivili chi totu is Paisus de s'Unioni afestint. A unu annu a oi, de candu ant donau sa tzitadinàntzia onorària a Liliana Segre, su Comunu de Gùspini donat su cuntribbutu cosa sua in forma simbólica po médiu de una campàngia de sensibbilizatzioni e cun s'ammosta bibliogràfica digitali chi su Sistema Bibliotecàriu Monti Linas at preparau e chi si podit castiai in sa retza (on line) de su 25 de Gennaxu fintzas a su 8 de Friaxu 2021 in su giassu: www.bibliotechelinas.it.