SARDU
Comunu de Gùspini: Prus de 50 crésias de su Romànicu s’ant a podi abbisitai a indonu in custus duus finis de cida chi funt lompendi, 10 – 11 e 17 – 18 de Cabudanni. Intra custas 15 funt de sa Províntzia de Aristanis, scioberadas po s’initziativa nomenada “Is diis de su Romànicu”, in sa prima editzioni sua in su panorama de is acontéssius sardus.
«Est un’acontéssiu culturali regionali de importu mannu chi interessat unu bellu númeru de monumentus mesuevalis», at nau Antonello Figus, presidenti de sa Fundatzioni “Sardegna Isola del Romanico”. «Eus trabballau impari a is amministratzionis comunalis e cun is gestoris de is giassus a manera de donai a is turistas e a is amantiosus de sa stória sa possibbilidadi de abbisitai is diferentis realidadis de su romànicu sardu, de is seus prus mannas a is cresieddas in su sartu, totus caraterizadas de séculus de stória e espressioni bia de su patrimóniu identitàriu de sa religiosidadi de is comunidadis localis».
Sa manifestatzioni punnat a su púbblicu prus mannu po chi potzat atzedi a sa stória e a is traditzionis secularis de s’ísula, fintzas cun abbísitas ghiadas, cun is voluntàrius postus a disponimentu de is Comunus e de is sugetus chi tenint sa gestioni de is monumentus.
Su Comunu de Gúspini aberrit a su púbblicu sa Crésia de Santa Maria de Malta gràtzias a sa collabboratzioni de sa Parróchia su 18 de Cabudanni a mengianu de is 10 a sa una (10.00-13.00) e a merii de is 4 a is 7 (16.00-19.00)