SARDU
Comunu de Carbònia: Una noba stravanada po totus is amantiosus de s'archeologia, de sa stória e de sa cultura: totus is domínigus de su mesi de Abrili 2019 (7, 14, 21, 28), su lunis de Pasca Manna (22 de Abrili) e s'Anniversàriu de sa Libberatzioni de s'Itàlia (25 de Abrili) su Nuraxi Sirai de Carbònia est abertu a su púbricu. S'acontéssiu punnat a torrai a tenni s'agradessimentu de is domínigus de su Meseladàmini de su 2018, candu prus de milli personas intra de residentis e turistas ant pótziu ammirai sa fortesa sardu-fenítzia, bisitendi is fortificaduras, sa porta pedonali, s'àrea sacra e sa prus antiga ofitzina de s'imbirdi.
S'acontéssiu dd'at organizau su Comunu de Carbònia, su Ministeru de is Benis Culturalis, sa coperativa "Sistema Museo", sa "Fondazione Cammino Minerario di Santa Barbara", sa Subraintendéntzia Archeológica, Bellas Artis e Paesàgiu po sa Tzitadi Metropolitana de Casteddu e is Províntzias de Aristanis de su Sud Sardigna"
S'acontéssiu de is "Domínigus in su Nuraxi" donat a is turistas e a is tzitadinus cosa nosta sa possibbilidadi de intrai in is sgavus fatus fintzas a immui e a cussus ancoras in cursu de òpera, gràtzias a sa preséntzia de una scuadra de trabballadoris pigaus a trabballai un annu de sa "Fondazione Cammino Minerario di Santa Barbara" e gràtzias a is bisitas ghiadas a incuru de sa coperativa "Sistema Museo".