SARDU
Comunu de Seddori: Est stétia incingiada s'espositzioni de su Casteddu de Seddori in su Tzentru culturali “G. Liliu” in Barùmini, in su matessi momentu, partit sa collabboratzioni intra de sa Fundatzioni “Su Nuraxi” e su Polu Museali po sa smenguadura de su costu de is billetus de intrada si si bisitant is sítius de Barùmini e de Seddori.
Su spàtziu espositivu asuba de su Casteddu si cumponit de 10 pannellus fotogràficus chi afigurant piessignus de is colletzionis e unas cantu riprodutzionis de il líteras de D'Annunzio a su Generali Nino Villa Santa (datadas intra de su 1917 e su 1927), is originalis funt custodiadas in su Casteddu de Seddori.
Unu spàtziu importanti po su Casteddu de Seddori apariciada acanta a s'ammosta temporànea su "Mito dei Gladiatori nell'antica Roma e Sardegna" chi ddoi est in su Tzentru "G.Lilliu".
Is millas turístas chi cust'istadi ant a bisitai "Su Nuraxi" e s'ammosta asuba de is gladiatoris podint scoberri chi a pagus chilométrus de distàntzia, in Seddori, ddoi at unu Casteddu únicu chi s'est apoderau perfetamenti sanu chi custódiat colletzionis de grandu valori.
S'espositzioni in su Tzentru "G. Lilliu" nascit de s'acórdiu retzenti de "Atzionis de prumotzioni turística comuna" intra de sa Fundatzioni "Sistema Cultura" de su Comunu de Barùmini e su Comunu de Seddori.
"Seus de sa bidea – narat su Síndigu de Seddori, Alberto Urpi – chi sa prumotzioni turística depat èssiri fata in manera cordinada cun s'interessamentu de totu su territóriu. Poneus imparis energias, a solus non si andat ananti. Seus orgolliosus de ai ativau custa grandu collabboratzioni cun su sítiu Unesco, "Su Nuraxi" atirat dónnia annu 100 mila bisitadoris. Custa espositzioni at a èssiri bisitada de chini cust'istadi at a bisitai Barùmini, seus cunvintus chi trabballendi impari e scambiendusí pràtigas bonas ndi gosaus totus".
In s'acórdiu intra de Seddori e Barùmini sa punna est sa collabboratzioni e sa strumbulladura de is intradas a is museus e a is sítius de interessamentu turísticu.
"Est s' inghitzu de una collabboratzioni importanti – cunfirmat s'Assessori a su Turismu de Seddori, Fabrizio Collu – su territóriu est in gradu de fai una proposta archeológica, culturali e esperientziali de importu mannu, collabborendi totus impari podeus èssiri prus atrativus e afortiai s'aflussu turísticu".
Sa tarifa ridúsia previdit chi is chi bisitant is museus de Barùmini e de Seddori (su Polu Museali Seddoresu, su Casteddu, su Museu Stóricu Etnogràficu de is paras Capucinus, sa Domu de su Pani) téngiat sa possibbilidadi de bisitai "Su Nuraxi", "Domu zapata" e su Tzentru "G. Lilliu" a una tarifa ridúsia, Sa matessi cosa po chini bisitat innantis Barùmini: at a tenni una smenguadura po s'intrada a is museus de Seddori.