SARDU
Comunu de Santu Antiogu: Su Comunu de Santu Antiogu afestat su 8 de Martzu 2019 cun unu spetàculu chi contat, cun una ironia aspra e pitziosa, is cunditzionis de trabballu de is fémminas in custus tempus de crisi económica. "Unghie e crisi" (Ungas e crisi) est sa rapresentatzioni chi, portada in scena de sa sostziedadi coperativa teatrali "L'Aquilone di Viviana" chi nc'est in s'Àula de su Consillu , cenàbara 8 de Martzu a is seti de a merí (19,00).
S'intrada est líbbera e a indonu.
Sa drammaturgia originali nascit de una circa in su campu fata in is zonas acanta de Casteddu, aintru de is domus de is estetistas gióvunas chi trabballant in nieddu e si ocupant de torrai a fai is ungas. Sa protagonista, Sonia, est una mamma gióvuna chi totu in una bessit estetista po netzessidadi, fadendi in su passarítziu de domu sua unu tzentrixeddu de bellesa. Sonia est una fémmina forti prena de risorsas, resistenti aici cumeti a tanti fémminas chi circant de afrontai sa vida e is imprevistus, agatendi solutzionis e oportunidadis. Intra de smaltus e limixeddas, donat cun bonucoru consillus, contus e dícius popularis po agiudai is clientis a ndi bessiri de is crisis esistentzialis cosa insoru. Una manera dereta, tràgica e irónica in su matessi tempus, po arrexonai asuba de is cunditzionis de sa fémmina e asuba de sa "traversada" a sa sola in sa sotziedadi de is tempus de oi. Sa drammaturgia at bintu in su 2009 su primu prémiu in su cuncursu "Donne e lavoro, Donne a lavoro" organizau de sa Províntzia de Casteddu e de s'assótziu culturali "L'Eccezione". Regia e drammaturgia funt de Ilaria Nina Zedda, e in scena nci funt Marta Proietti Orzella e Daniela Pulisci. Po acabbai, "light design" e "video mapping" funt a incuru de Marco Quondamatteo, intamis ténnicu de su sonu e de is luxis est Elvio Corona.