SARDU
Comunu de Giauni: M'arragodu ... Candu
S'Amministratzioni Comunali bolit arregolli testimóngius, memórias, contus e arregordus de su passau de is disterraus giaunesus.
Podint pigai parti totus is disterraus originàrius de Giauni cun unu contu, una poesia, una cantzoni o cantada chi arremmonit momentus passaus in Giauni.
Tareas:
Su fenòmenu de su disterru at interessau medas comunidadis sardas chi, po tantis arrexonis, ant detzidiu de disterrai. A inghitzai de is annus Sessanta s'Ísula est ferta de unu disterru de mannària impressionanti, chi ancoras oindí est difitzili apretziai. Segundu is datus statísticus disponíbbilis, podeus nai chi Giauni in su 1961 contàt prus o mancu 706 abbitantis mentras a su 31 de Meseidas 2018 ndi contat scéti 311. S'Amministratzioni Comunali de Giauni bolit, cun custu progetu, torrai a stabbiliri o apoderai is cuntatus cun is tantis personas disterradas chi rapresentant sa stória e s'identidadi de sa bidda, cunsideradas unu beni pretziosu. Su progetu cunsistit in s'arregorta de memòrias; contus, momentus, líteras, poesias, cantzonis/ cantadas, chi arremonant is momentus passaus in Giauni.
Bandu de partitzipatzioni:
- 1. podint pigai parti a su bandu totus is disterraus originàrius de Giauni;
- 2. is òperas podint essi scritas in italianu o in sardu;
- 3. is òperas non depint essi stétias pubricadas ( nimancu in sa retza);
- 4. is òperas podint essi: contus, líteras, poesias, cantzonis, arregordus crutzus de momentus passaus in Giauni;
- 5. dónnia òpera depit portai a is peis de su fólliu totus is datus de s'autori: nómini, sangunau, residéntzia, númunu de telefoneddu e períodu de arrelatu de sa stória;
- 6. s'autori depit mandai s'autorizzatzioni a sa pubricatzioni e s'acunsentimentu o no a s'umperu de is datus personali donaus, in su respetu de is normas in vigéntzia in matéria de amparu de sa riservadesa;
- 7. sa partitzipatzioni a su bandu est a indonu e costituiscit un'autorizzatzioni crara a sa pubricatzioni, non po dinai. Is òperas imbiadas non ddas torrant;
- 8. Non funt pigaus in cunsideru contus chi podint ofendi àteras personas;
- 9. is òperas podint essi : a) mandadas in paperi a su Comunu de Giauni - Prov. Sud Sardegna - Pratza San Giuliano (09020); b) mandadas po médiu de "e-mail" in formatu PDF a s'indiritzu: servizio.sociale@comune.genuri.vs.it;
- 10. Sa data de scadéntzia po mandai is òperas est su 31 de Argiolas 2019.
Su progetu non bolit essi unu cuncursu literàriu duncas non ddoi at nisciuna crassífica. Totus partitzipant a su 1° postu po ai donau un'agiudu pretziosu a sa stória e a s'identidadi de Giauni.
Totus is òperas s'arragollint in unu libbureddu chi at essi pubricau e donau a dónnia partitzipanti.