SARDU

Comunu de Gùspini: In sa matessi dí de sa Giornada Internatzionali Contras a sa Violéntzia asuba de is Fémminas, sàbudu 23 e lunis 25 de Donniasantu , una cedda de assótzius, trabballendi imparis, organizant unu momentu importanti de arrexonu asuba de is efetus trotus chi produsint is bideas precontzetas in is cunfrontus de is fémminas.

“Est in custus efetus trotus – sutaliniant is organizadoris de sa nota po is gionalis – chi agatant nutrimentu is arreíxinis de sa Violéntzia asuba de is Fémminas e de custa boleus fueddai chentza de si limitai a contai cantu funt is vítimas … Una est giai meda !!!”.

Sàbudu 23 de Donniasantu, a is cincu de a merí (17.00)

Sa proposta 2019 est sa de un’argumentu de grandu importu afrontau po médiu de unu film – documentàriu e unu líbburu: Is fémminas chi detzidint de non fai fillus.

Lunàdigas, custu su títulu de su film, contat una realidadi chi oramai no est prus un’etzetzioni e scrucullat unu mundu de medas formas. “ Si po calincuna est una rinúntzia, unu disígiu mortificau de sa provisoriedadi e de sa mancàntzia de servítzius sotzialis, is tantis protagonistas de Lunàdigas contant prusaprestu unu cambiamentu in sa manera de intendi e de si intendi, de si movi in sa sotziedadi – spricant is autoras e registas Nicoletta Nesler e Marilisa Piga – unu cambiamentu chi, in medas ocasionis, at sighiu a si scontrai cun unu pregiudítziu. O in manera prus simpli cun unu giudítziu negativu”.

Su fueddu Lunadigas benit de sa Língua Sarda e dda umperant is pastoris po inditai is brebeis chi in stasonis determinadas non faint fillus. Is autoras e registas ant scioberau custu fueddu cumenti a títulu de s’òpera cosa insoru in mancàntzia de unu fueddu de sa língua italiana, chi inditat custa cunditzioni scéti po médiu de negatzionis: “chentza de fillus”, “non mammas”.

Su film est stétiu proietau in is salas tzinematogràficas de totu s’Itàlia e sighit a essi scioberau in is festival natzionalis e internatzionalis.

Is autoras si connoscint in Sardigna in su 1991 innui trabballant imparis in  sa ràdiu e a sa cumpridura de documentàrius po sa RAI. Si scerant po sa circa de unu linguàgiu nou in su manixu de argumentus sotzialis de importu. Cun su progetu Lunàdigas creant arrelatas cun fémminas Lunàdigas, medas, arregollendi e contendi is stórias cosa insoru.

2017 –

• “Festival Chouftouhonna” de Túnisi, prémiu po su mellus cortometràgiu;
• “Porn Film Festival” de Berlino, prémiu po su mellus documentàriu;
• “Mediterraneo Video Film Festival”, prémiu po su mellus longumetràgiu.

2018

• “Queer Lisboa Prémiu de su Púbricu”

A su film si acostat su líbburu “Monologhi Impossibili”, de Carlo A. Borghi, innui agatant boxi is fémminas de su Mitu e de sa Stória chi no ant mai tentu fillus. Si ndi fueddat luegus apustis de sa proietzioni, cun is registas/autoras e cun su scritori.

Lunis 25 de Donniasantu, a is tres e mesu de a meigama (15.30)

Atóbiu in is Giardinus Púbricus, a sa Panchina Arrúbia, de innui inghitzat una passillada faci a is àteras Panchinas Arrúbias postas in su 2018 po arregordai is Vítimas de Femmintzídiu e totus is Fémminas Vítimas de dónnia tipu de violéntzia.