SARDU
Comunu de Serramanna: Fonti: "La Gazzetta del Medio Campidano": S’impinnu de s’Unioni Italiana de is Tzurpus de is Ipovedentis de Nùgoro in sa promotzioni de su progetu “Grazia Deledda in esalettura” at biu puru sa partetzipatzioni de su Campidanu de Mesu cun d-unu eventu in Serramanna, e sa partetzipatzioni at a essi de prus me is datas afatantis.
S’initziativa dd’ant promòvia po su de cuatru annu de sighida. Su progetu, nàsciu in forma sperimentali, at otènnidu unu sucessu importanti meda cun s’impinnu de sa Regioni Autònoma de sa Sardigna chi bolit promovi custa initziativa in totu s’Itàlia e puru in manifestatzionis diferentis europeas po tzelebrai is 150 annus de sa nàscida de Grazia Deledda, e sa promotzioni de s’òpera sua, ùnica fèmina italiana chi at arriciu su prèmiu Nobel po sa literadura.
Su progetu bolit amostai ca, candu una persona chi no biit impreat su sistema de letura e scritura braille, podit gestiri is informatzionis culturalis cumenti fait unu chi biit. In custa serada ant a essi fatas duas leturas de duas novellas de Grazia Deledda, pigadas de s’arregorta “Il sigillo d’amore”: una lìgia de unu tzurpu utilizendi unu libru in braille e s’atra lìgia de una persona chi biit de unu libru a stampa. Donniunu, utilizendi su strumentu suu de atzessu a sa cultura. A is letoris ant postu acanta sa tradutzioni in sa Lìngua Italiana de is Sinnus (LIS), po ndi sciusciai dònnia barriera e creai eventus de letura atzessibilis a totus po realizai una inclusioni globale. Sa “esalettura” serbit po tenni a disponimentu s’òpera de sa Deledda in ses formaus diferentis: in nieddu po is chi bint, in braille po is tzurpus, in e-book po is suportus informàticus, in formau gestìbili de sa sintesi vocali e de is barras braille, in formau àudiu e in formau videu cun tradutzioni LIS. Sa testimoniàntzia de totu su traballu est arregorta in su situ www.esalettura.com de su cali si podit scarrigai e castiai a indonu is novellas in totu is estensionis diferentis. Is file àudiu e videu de is novellas funt stètius realizaus in stùdiu po ddus podi utilizai is su formau mellus.
A totus is chi ant partetzipau a su cursu ant arregallau unu libru de novellas, portendi aici a innantis s’impinnu pigau de fai intrai unu libru de Grazia Deledda in dònnia domu.
de Eleonora Malloci