SARDU
Comunu de Gùspini: “Arreíxinis a su benidori” est s’argumentu scioberau po s’editzioni 2019 de Monumenti Aperti, sa manifestada fissada po su 11 e su 12 de Maju chi aunit s’abertura a su púbricu de is logus de interessamentu stóricu – ambientali a sa partitzipatzioni ativa de is scolas e de is assótzius localis, avalorendi imparis didàtica e cumpartzidura culturali cun sa tarea de spartzinai sa connoscéntzia, a 360° gradus, de su patrimóniu tzitadinu arricu e diferentziau. Unu patrimóniu de arreíxinis e de identidadis chi po abarrai biu tenit abbisóngiu de linfa e atentu de parti de totus. In una prospetiva de sinergias e sighidura inghitzada de tempus, ocannu puru su Comunu de Gùspini si acapiat a Arbus po médiu de strumbullus fitianus e novidadis chi interessant camminus naturalis e camminus manixaus de s’ómini, s’arresurtau stóricu de un’identidadi e de unu patrimóniu materiali e immateriali chi si funt assentaus, atóbiaus e ammesturaus.
In Gùspini is logus chi si podint bisitai funt 7 e bint impinniaus 340 studiantis-ghias chi ndi benint de 3 Istitutus scolàsticus: “I.I.S. Buonarroti”, Diretzioni didàtica, Istitutu Cumprensivu “E. Fermi+ Da vinci, de is studiantis-ghias 28 funt frantzesus, cun s'agiudu de 8 assótzius guspinesus, s’agiudu de sa Parróchia de San Nicolò e de sa Commissioni Paris Oportunidadis.
Duas is novidadis de s’editzioni 2019: su Depositu béciu de bia Verdi e sa zona stórica de su Campusantu: connotu de is guspinesus cumenti su depositu, su fàbricu in stili neocràssicu de is primus Annus ‘20 de su Noixentus a is peis de su Monti Santa Margherita est su logu innui iant detzidiu de ponni, candu fiant fadendi s’acuedotu, su serbatóiu de s’àcua púbricu. Innòi, difatis, is famíllias de sa bidda andant a pigai s’àcua po bufai, umperendi is grifonis púbricus postus aposta: fiat bessiu in pagu tempus unu logu identitàriu po is guspinesus chi ddi praxiat passai su tempus innòi a chistionai, a si gosai s’ambienti, s’ària frisca e sa vista.
Sa segundu novidadi est sa bisita a sa parti stórica de su Campusantu de Gùspini. Su progetu de custu est de su 1866 e est in stili neocràssicu e is trabballus fiant stétius acabbaus in su 1868. In sa zona stórica de su Campusantu si podint biri is monumentus funeràrius dedicaus a personas de importu chi, a títulu diferenti, ant cuntribbuiu a su svilupu de sa sotziedadi guspinesa.
Intra de is acontéssius spetzialis, s’ammosta “Madri della Costituzione. Itinerari di democrazia”. Fata de su “ANPI Sardegna” e prumóvia de sa Commissioni de is Paris Oportunidadis de Gùspini si podit biri in su Molino Garau; “Monumenti in musica”, su cuntzertu de is studiantis de su Cursu a indiritzu musicali de s’Istitutu Cumprensivu “E.Fermi+Da Vinci” (domínigu 12 a is seti de a merí (19,00) in pratza Sa Mitza de Santa Maria); s’espositzioni “Minerali e ainas de miniera” a incuru de s’assótziu “Sa Mena”, chi si podit bisitai in is aposentus de sa Scola bécia Sanna; e a s’acabbu bisitas a indonu puru a is colletzionis Castoldi e Tuveri in su pianu terra de sa Diretzioni de Montibéciu innui, sàbudu 11 de Maju, a inghitzai de is cuatru de a merí (16,00), nc’est sa presentada de su líbburu de fotografias “20 storie di Sardegna” de Domenico Ruiu e Massimiliano Mele, proietzionis e aprofundamentus asuba de “Miniere e minerali di Sardegna” a sa preséntzia de s’autori Luciano Otelli.