SARDU
Comunu de Gùspini:
Su 16 de Gennaxu passau, in Terraba, is cuatru síndigus de s’Unioni de is Comunus “Monte Linas – Dunas de Piscinas, is cincu síndigus de s’Unioni de is Comunus de su Terrabesu e s’Assessori Regionali a sa Programmatzioni Raffaele Paci ant firmau su protocollu finali de su Progetu Territoriali “Dal mare verso l’interno: gli itinerari del terralbese e del Linas”.
Su progetu dd’ant presentau is Presidentis de is duas Unionis Giuseppe De Fanti e Emanuele Cera, e su Professori Italo Meloni de s’Universidadi de Casteddu chi, po médiu de su CIREM, at fatu sa parti ténnica de su Progetu.
Su dinai postu a dispositzioni de su territóriu est de 27 milionis de eurus, de custus: 20 funt po is òperas de infrastrutura e 2 milionis funt po is zonas úmbidas. Is 5 milionis chi abarrant funt riservaus intamis a is impresas de su territóriu e ddus intregant po médiu de bandus aposta.
Su progetu de svilupu punnat a s’avaloramentu de is risorsas stóricas, culturalis e ambientalis de su territóriu po tareas turísticas po médiu de una sistematizatzioni totali.
Un’àtera parti de is propostas interessat sa mellioria in campu sotziali de is servítzius a sa pessoni de is comunidadis po is antzianus e pruscatotu de is chi interessant a is gióvunus e a is famíllias.