SARDU

Comunu de Gùspini: “Sa Dí de sa Memória”

Su  27 de Gennaxu nc’est torra  “Sa Dí de sa Memória”,  una recurréntzia internatzionali chi  si tzelebrat su 27 Gennaxu de dónnia annu po arremonai is vítimas de s’Olocaustu (sperdidura).  Custa data dd’at inditada sa resolutzioni 60/7 de s’Assembrea Generali de is Natzionis Unidas de su 1 de Donniasantu 2005, in s’interis de sa de 42 reunionis prenàrias.

A  innantis de sa Resolutzioni, su 24 de Gennaxu  2005 ddoi at stétiu un’atóbiu spetziali innui s’Assembrea Generali de is Natzionis Unidas at afestau su de 60 anniversàrius de sa libberatzioni de is campus de cuntzentramentu nazistas e s’acabbu de s’Olocàustu (sperdidura).

Sa scera de tzelebrai “Sa Dí de sa Memória” dónnia 27 de Gennaxu est acapiada a sa data de su 27 de Gennaxu 1945, candu is trupas de sa “Armata Rossa”, strobbadas in s’atacu “Vistola-Oder in diretzioni de sa Germània, iant libberau su campu de cuntzentramentu de Auschwitz.

Po arremonai sa “Shoa” e pigai parti a sa “Dí de sa Memória”,  in sa Biblioteca Comunali “Sergio Atzeni”,  de su 25 de Gennaxu fintzas a su 9 de Friaxu 2019, ddoi at un’ammosta bibliogràfica, a incuru de su sistema bibliotecàriu “Monte Linas” e de is voluntàrius de su progetu de su Servítziu Tzívili Universali “Bibliotecare 2018”.