SARDU
Comunu de Igrèsias: S’Ufìtziu Turìsticu Comunali, cunsiderendi su sutzessu mannu chi at tentu s’initziativa in su perìodu de is festas, torrat a organizai is bìsitas a in su Campusantu Monumentali. Is ghias, passillendi in mesu de is tumbas, ant contai a bisitadoris sa vida de personàgius e famìlias chi ant tentu unu ruolu de importu mannu in sa stòria de sa “Citari”. Siguramenti is òperas prus interessantis funt is chi at scurpiu Giuseppe Sartorio, s’artista famau chi narànt su “Michelàngelu de is mortus”.
Is bìsitas, chi ant a durai un’ora e cuartu, incumentzant a is 09:00 e a is 10,30. S’atòbiu est in sa geca principali de su campusantu in via Cappuccini e costant €5 a persona ma funt in donu po is pipius finas 10 annus. Po assigurai su rispetu de is mesuras de siguresa in matèria de preventzioni anticovid sa prenotatzioni est obbligatòria e si arregordat a totus chi in sa bìsita tocat a abarrai a mascaredda posta e a lassai sa distàntzia de assumancus unu metru de is àteras personas. Po informatzionis o prenotai sa bìsita tocat a telefonai a s’Ufìtziu de su turismu de Igrèsias a su nùmeru 0781/274507, obertu dònnia dii de is 10 a is 12 e de is 15,30 a is 18,30.
In su mentris s’Amministratzioni Comunali sighit cun s’atzioni de recùperu de su patrimòniu architetònicu e artìsticu chi si agatat in citadi a manera chi custu si trasformit in d-una atrativa culturali. Infatis is ufìtzius comunalis ant giai incarrerau is protzeduras burocràticas chi ant a permiti de aconciai, in collaboratzioni sun sa Sopraintèntzia de Casteddu, su monumentu a Quintino Sella (in sa pratza omònima) e su chi ant dedicau a is mortus in gherra (de Francesco Ciusa) de pratza Oberdan. In prus in su campusantu monumentali s’at a arrangiai sa “Pipia cun su circu”, un’òpera de una bellesa ispantosa scurpia de Giovanni Sartorio, chi genti mali intraniada iat strupiau unus dexi annus a coa.