SARDU
Comunu de Igrèsias: Sàbudu chi benit su tzentru stòricu de Igrèsias aberrint is crèsias si trasformat in unu camminu urbanu chi contat sa vida e is artis de is igresientis aundi is arrugas funt is passirìcius, is palàtzius e crèsias is salas de unu museu mannu meda.
A mengianu, de is 10 a is 13, acumpangiaus de is ghias diocesanas si podint bisitai sa seu de Santa Crara, sa crèsia de sa Madonna de is Gràtzias, sa crèsia de Santu Franciscu, sa crèsia de sa Purissima e su Museu Diocesanu.
A merì, de is 15:30 a is 20:30, si podint bisitai su Museu de is Bistimentas e de is traditzionis, su Museu Mineralògicu, su Museu de s’Arti Minerària, su Museu Remo Branca, su Casteddu de Salvaterra cun sa mostra de is torturas mesuevalis, s’amparu antiaereu de bia Eleonora, su chiostru de Santu Franciscu cun sa Mostra de su Pani e su parcu de Villa Bodetti.
In dònnia crèsia o museu si intrat a grupus de 10/15 personas e sa bìsita durat una mesora. Craramenti tocat a rispetai is normas anticovid sichei ddoi at s’òbbligu de mantenni su distantziamentu sotziali, de abarrai postus de mascaredda e de si igenizai is manus in antis de incumentzai sa bìsita.
Collaborant a s'eventu: su Comunu de Igrèsias, Iglesias Servizi srl, Ufìtziu Benis culturalis Ecclesiàsticus - Diocesi de Igrèsias, Ass. Tur. Pro Loco Iglesias, Ass. Periti Minerari, Ass. Remo Branca, Ass. Compagnia Balestrieri Fontana, Ass. C.I.S.S.A. Gremio Vignaiuoli Contadini.
Invècias a is 18, in su Teatru Electra, Francesco Abate presentat in pari a Federica Musu s’ùrtimu romanzu suu “ I delitti della salina”. Custu eventu e parti de sa FieraOff, sa rassegna permanenti chi si ponit a costau de sa Fiera de su Lìburu de Igrèsias. Po podi partetzipai tocat a prenotai mandendi una mail a argonautiluslab@gmail.com