SARDU
Comunu de Igrèsias: Domìniga 4 de mesi de ladàmini est acabada sa de cincu editzionis de sa Fiera de su Lìburu de Igrèsias. Mancai non siat stètiu fàtzili po mori de s’apretu sanitàriu, is organizadoris de s’assòtziu ArgoNautilus funt arrinnescius a cuncordai un’eventu de valori culturali mannu meda. In logu de is datas canònicas a giru de su 25 de abrili, chi asseriant a essi pròpiu in mesu de sa corantena, ddis est beniu a marolla a tramudai sa Fiera in primas diis de s’atòngiu.
Sa fiera, pretzèdia de unus cantu eventus comenti sa mostra de “Chine Vaganti” in s’Istitutu Mineràriu e sa presentada de su lìburu de Anna Rita Briganti a pitzus de Alda Merini in sa Tonnara de Portescusi, est incumentzada in manera ufitziali giòbia a is 17:30 in su Teatru Electra. In su palcu ddoi iant is rapresentantis de is Comunus partner de sa Fiera: Santadi, Portescusi, Tzeddiani e Igrèsias e Alberto Zonchello de s’assessorau a sa Cultura de sa RAS. Totus de chi ant mandau unu saludu e fueddus de incoramentu a sa comunidadi de Gonnesa, àteru comunu partner chi est bivendi unu momentu de dificultadi manna po mori de s’apretu de su covid, ant apretziau s’initziativa custa initziativa chi est de brofetu mannu po su territòriu e ant assigurau su sustegnu insoru fintzas po su benidori.
Su tema de ocannu “La Parola crea Mondi”, su Fueddu chi criat Mundus, est a narri sa capatzidadi de is fueddus de criai, assetiai e fintzas distruiri sa realidadi, at ghiau totus is eventus de sa Fiera.
“la colazione d’autore” dònnia dii at abertu is traballus: sètzius a mesa in d-unu cafè de su tzentru stòricu, is letoris ant arrexonau in manera informali cun is autoris, a merì invècias asuta de Maimoni in pratza La Marmora ddoi iat “La Casa degli Autori in Fiera” aundi is scritoris giòvunus, intr’e custus su santantioghesu Filippo Lorrai (Il Grande Erik – bincidori de su prèmiu RAI-ERI in su 2018) ant pòtziu presentai is òperas insoru.
Interessantis meda is masterclass fatas in su Teatru Electra caraterizadas caraterizadas de s’interatzioni intr’e su pùbblicu e is professionistas. Giòbia Piergiorgio Pulixi, cun d-una full-immersion de 7 oras, at spiegau a comenti si passat de sa letura a sa scritura de su romanzu noir ghiendi is presentis in is arrexonis chi podint cunvinci unu letori a abarrai avatu a unu contu; cenàbara Luigi Sanciu at ammostrau a comenti si scriint artìculus scentìficus e curriculum vitae chi potzant atirai s’atentzioni de is impresas; sàbudu Daniela Aretino oberendi is fueddus de su Breve di Villa di Chiesa, s’antigu statudu chi poniat règula in sa vida de is cresientis in su mesu evu, at ammostrau una tzitadi bia e oberta a su cummèrtziu sinnialendi unus cantu sardismus e meda fueddus de origini germànica chi si agatant in su testu scritu in volgari toscanu; a ùrtimu domìniga a mengianu Stefano Lamorgese (Report) at chistionau de is fueddus de su giornalismu de inchiesta e at spiegau fintzas a comenti is inchiestas localis, si funt beni fatas, permitint a is comunidadis de si-ndi sapiri de problemas chi a bortas funt gravis e perigulosas.
Sa pratza de sa Seu a mericeddu fiat sèmpiri prena de genti chi at ascurtau is arrexonadas intr’e Antoni Manzini (su “babbu” de su vicecuestori Rocco Schiavone) e cun Piergiorio Pulixi, de Gianluca Ales (Skytg24) cun Giuseppe Civati e Roberta Balestrucci, sentida meda sa lectio magistralis de Andrea Campolongo, arribada apostadamenti de Parigi po contai sa “La lezione di Enea”.
Sendi chi sa de Igrèsias est “fiera” de su lìburu in duus atobius ant analizau fintzas chistionis prus tècnicas, chi costumant a abarrai “cuadas” po is letoris. Duncas cenàbara a merì s’est arrexonau de is problemas de su mundu de s’editoria sarda cun is editoris chi circant su sustegnu de is istitutzionis po bendi is produtzionis insoru, is autoris chi bolint amparu po su mestieri e su traballu insoru e no est mancau unu “certu” po is editoris “imprentadoris” de totu e po is editoris “tipògrafus” chi non donant cura e no agiudant is autoris insoru. Sàbudu a merì est stètia interessanti meda s’arrexonada in contu de sa netzessidadi de fai e criai retza intr’e is festival literàrius.
Dòminiga a mengianu, de chi ant presentau s’atividadi de is Argocìrculus, aundi una borta a su mesi is sòtzius si atobiant po arrexonai de unu lìburu s’est chistionau de saludi: Riccardo Trentin, presidenti de sa Rete Sarda Diabete, at fatu una bella stèrrida pretzisa cun su tema de sa fiera, spieghendi chi si depit fueddai de “personas cun sa diabeta” e non prus de “diabèticus” a manera chi mudit fintzas s’aprotzu de is istitutzionis a custa problemàtica chi inferrit meda in sa Terra nostra. A merì s’est fata s’esibitzioni finali de su progetu “Ad alta voce” pentzau e ghiau de Chiara Cuticca e a primu noti sa paristòria sinfònica “Pinocchio” a in curu de su Circolo Musicale Giuseppe Verdi at serrau sa fiera.
Maurizio Cristella, diretori artìsticu de sa Fiera, at nau chi mancai non si siat pòtzia fai s’atividadi de promotzioni in is scolas – s’idea de fai una fiera in Igrèsias e nàscia pròpiu poita ca is sòtzius de Argonautilus si fiant acataus chi sceti unu studenti de Igrèsias iat pigau parti a un’eventu leteràriu - est cuntentu de is resurtaus de s’editzioni de ocannu chi est stètia spainada oberendi canalis nous (is diretas Facebook e radiofònicas de sa sea de s’emitenti igresienti Radio Arcobaleno) e at aciuntu chi po s’annu chi benit, ant provai a dedicai unu pagheddu de “spàtziu” puru a is chistionis de sa lìngua sarda.