SARDU

Comunu de Casteddu: Atòbius su 7 e 8 de mesi de ladàmini 2022. At a inghitzai cenàbara su 7 de ladàmini 2022 in sa Pratza de su Cramu in Casteddu, sa de ses editzioni de “Cagliari International Wine&Food Festival. S'initziativa, aprontada cun su patrotzìniu de su Comunu de Casteddu, de sa Fundatzioni de Sardigna, de sa Coldiretti Sardigna e de sa Fundatzioni Distretu Sardigna Bio, at a acabai sàbudu 8 a pustis de duas diis de tastaduras, masterclass, cunvegnus, cuncursus e un'asta de benefitzèntzia. “S’Assessorau nostu- si narat Alessandro Sorgia, Assessori a is Atividadis Produtivas e Turismu, chi at pigau parti a sa cunferèntzia de presentatzioni – partetzipat cun d-unu finantziamentu donau gràtzias a unu bandu asuba sa promotzioni turìsticu-cummertziali de sa tzitadi. In prus cumenti in su 2019, eus scerau Pratza de su Cramu poita ca aici arrispetaus is inditus donaus de su Sìndigu Paolo Truzzu e de sa Giunta, a manera chi is casteddajus potzant bivi e frecuentai custa pratza ca in su tempus passau fiat su logu de is atòbius elegantis po is tzitadinus de Casteddu. Seu siguru ca ant a partetzipai in medas a pustis de duus annus difìtzilis po is atividadis produtivas”.