SARDU

Comunu de  Sàrdara: Fonti: "La Gazzetta del Medio Campidano": Cun prus de centu iscritus, s’Universidadi de sa de Tres Edadi de Sàrdara inaugurat su cursu de geologia. A ddu nai, Angelo Mascia, presidenti de s’assòtziu, e Lauro Onnis, vitzepresidenti, chi de su 2021 organizant is letzionis e is atividadi asuba is argumentus de stòria de sa Sardigna po fai partetzipai is tzitadinis de Sàrdara e de is biddas acanta. Po s’UniTre est importanti donai unu spàtziu a argumentus scientìficus: a pustis de su sucessu de su cursu de archeològia, funt prevìdias cuatru letzionis dedicadas a is disciplinas geològicas, chi ant a analizai sa crèscida de is territòrius de sa Sardigna e su problema de su cambiamentu climàticu po mesu de su stùdiu de is fossilis e de is mineralis. Sa prima cunferèntzia, amostada de sa professoressa Carla Buosi e de su tìtulu “Is fossilis cumenti indicadoris de cambiamentus ambientalis e climàticus de su passau e de oi” fata sàbudu su 28 de gennàrgiu, a pustis de una introdutzioni pitica po contu de Luca Fanfani, presidi de sa facultadi de Scièntzias de s’Universidadi de Casteddu. S’atòbiu imbenienti at a essi cenàbara su 17 de friaxu, cun sa letzioni de su professori Fabrizio Cocco intitolada “Geològia de sa Sardigna cun tretus asuba su Campidanu e sa zona de Sàrdara”. Sa de tres cunferèntzia, “Minerali, minieras e eredidadi ambientali”, s’at a tenni su 3 de martzu, asuta sa ghia de professor Giovanni de Giudici. S’ùrtimu atòbiu est po sàbudu su 25 de martzu, cun d-una letzioni fata de su professori Giuseppe Scanu e intitolada “Matas fossilis: unu scussòrgiu disconnotu”. Custa atividadi noba amostat s’obietivu de s’UniTre de Sàrdara, est a nai fai connosci a is personas de dònnia edadi e aprontai unu ambienti innoi totus podint cumpartziri is connoscèntzias chi tenint. Difatis su dìciu “totus studiantis e totus maistus” s’arreferit a sa collaboratzioni chi ddoi at in custu spàtziu culturali, innoi totus tenint sa possibilidadi de imparai calincuna cosa o de dda fai connosci. Sa crèscida de is iscritzionis donat prexu a su presidenti e a su vitzepresidenti, chi ant giai apariciau unus cantu de initziativas po is mesis chi benint. In prus ant a essi organizadas passilladas e su progetu “Aquae Neapolitanae”, giai ighitzau in su beranu 2022 cun sa valorizatzioni de is Termas Romanas de Santa Maria Aquas. S’obietivu printzipali est cussu de torrai a donai importàntzia a is domus e a is monumentus stòricus chi ddoi funt in su territòriu de Sàrdara, Collinas, Pabillonis e Guspini, aici chi potzant essi testimòngius de sa stòria de su territòriu nostu.